Алматы қалалық полициясы бірнеше миллион теңге көлемінде айыппұл төлемей жүрген жүргізушілерді анықтады, деп хабарлайды BAQ.KZ Polisia.kz-ке сілтеме жасап.
Алматы қалалық полиция департаментінің жергілікті полиция қызметі 24 сағат ішінде жол қозғалысы ережесін жүйелі бұзып, айыппұл төлеуден жалтарған 6 көлік иесін ұстады.
Мәселен, ұсталған азаматтардың бірінің жалпы айыппұл сомасы 5,5 миллион теңгеден асқан. Ал тағы бір Toyota Alphard көлігінің жүргізушісіне салынған айыппұл көлемі 1 миллион 86 мың теңгені құрайды.
Барлық көлік мамандандырылған айыппұл тұрағына жеткізілді. Иелеріне берешектерін белгілі мерзімде өтеу туралы ресми ескерту жасалды.
Жазаның бұлтартпастығы – жолдағы тәртіптің кепілі. Айыппұлдарды жүйелі түрде елемеу көлікті тәркілеуге дейін апаратын әрекет екенін азаматтар түсінуі тиіс. Біз формальдылықпен емес, нақты заңдылықпен жұмыс істеп жатырмыз, - деді Алматы қалалық ПД ЖПҚ басқармасы бастығының орынбасары Тимур Ноғайбаев.
Полиция тұрғындарды көлік басқару мәдениетін сақтауға және айыппұлдарды дер кезінде төлеуге шақырады.
