"Тарифті инвестицияға айырбастау" бағдарламасы шеңберінде әлеуметтік осал азаматтарға 5,4 млрд теңге бөлінген, деп хабарлайды Алматыдағы BAQ.KZ тілшісі.
Бұл туралы Алматы қаласының Өңірлік коммуникациялар қызметінің брифингінде Жұмыспен қамту және әлеуметтік бағдарламалар басқармасының басшысы Бауыржан Жаубасов мәлімдеді.
Әлеуметтік осал азаматтардың тоғыз санатындағыларға "Тарифті инвестицияларға айырбастау" бағдарламасы шеңберінде өтемақы алгоритмі енгізілді. Оларға ардагерлер, мүгедектер, көпбалалы отбасылар, зейнеткерлер және қолдауды қажет ететін басқа санаттар жатады. Бүгінгі таңда әлеуметтік төлем мөлшері 0,8 АЕК немесе 3 146 теңгені құрайды. Төлем алушылар саны – 141,7 мың адам, көрсетілген көмектің жалпы сомасы – 5,4 млрд теңге, - деді Бауыржан Жаубасов.
Өз сөзінде Бауыржан Жаубасов коммуналдық инфрақұрылымды жаңғырту қажеттілігіне және тарифтердің сөзсіз өсуіне қарамастан, қала үшін халықтың әлеуметтік осал санаттарын қолдау басымдық болып қалатынын атап өтті.
Айлық есептік көрсеткіштің жыл сайынғы 6,5%-ға өсуін ескере отырып, халықтың әлеуметтік осал топтарын қолдау үшін қолданыстағы әлеуметтік төлем тарифтерінің ағымдағы өсуін толығымен жабады және қолданыстағы ережелерге сәйкес аудан әкімдіктері көрсететін болады, - деді Бауыржан Жаубасов .
2025 жылғы 1 қаңтардағы жағдай бойынша Алматыда халықтың әлеуметтік осал топтарына жататын 339 849 азамат тұрады, олардың ішінде:
ҰОС ардагерлері – 38 адам;
көпбалалы отбасылар – 41 992 адам;
мүгедектігі бар адамдар – 29 456 адам;
зейнеткерлер – 252 528 адам.
