Алматы облысында 16 жастағы турист қызды жылан шағып алды

Алматы облысындағы Көлсай көлдері аумағында 16 жастағы турист қызды жылан шағып алды. Зардап шеккен жасөспірімге Төтенше жағдайлар министрлігінің құтқарушылары жедел көмек көрсетті.

ТЖМ мәліметінше, кезекшілік кезінде демалушылар жедел-құтқару жасағының қызметкерлеріне жүгініп, болған оқиға туралы хабарлаған.

Құтқарушылар қызға әмбебап құтқару бекетінде алғашқы медициналық көмек көрсетіп, кейін қызметтік автокөлікпен медициналық мекемеге жеткізген.

Ведомство жаз мезгілінде жыландардың белсенділігі артатынын ескертіп, табиғат аясында демалғанда қауіпсіздік ережелерін қатаң сақтауға шақырды.

Құтқарушылар туристерге белгіленген бағыттардан шықпауға, демалатын орынды мұқият тексеруге және бауырымен жорғалаушыларға жақындамауға кеңес берді.