Мәжіліс депутаты Жарқынбек Амантайұлы Премьер-министрдің орынбасары Тамара Дүйсеноваға жолдаған сауалында ядролық сынақтар салдарынан зардап шеккен азаматтардың назын жеткізді, деп хабарлайды BAQ.KZ тілшісі.
Ол депутаттық сауалына Павлодар облысының ядролық сынақтардың әсеріне ұшыраған Ақкөл және Май аудандарында тұрған және тұрып жатқан азаматтардың бірқатар өтініші негіз болып отырғанын сөз етті.
Депутаттың сөзінше, тұрғындар өздерінің ядролық сынақтар салдарынан зардап шеккен азаматтар санатына жататынына қарамастан, осы санаттағы халық үшін көзделген әлеуметтік жеңілдіктерді толық алмай отырғанына қатысты жанайқайын жеткізіп отыр.
Жарылыстар болған аймақтарда тұрған халықтың денсаулығына ядролық сынақтардың тікелей әсері болғанын, олардың денсаулығына айтарлықтай нұқсан келгенін және оның адамның жасы ұлғайған сайын күшейе түсетініне күмән келтіруге болмайды. Сондықтан олардың барлығы да ядролық сынақтардың зардап шеккен азаматтардың қатарына жатады, - деп айтты Амантайұлы.
Депутат атап өткендей, өтініш иелері өздерінің денсаулық, отбасының жағдайына байланысты басқа елді-мекендерге көшкенде, ядролық сынақ салдарынан зардап шеккен азаматтар ретінде алып отырған бірқатар жеңілдіктерін ала алмай қалып отыр Алайда, бұл адамдардың денсаулығы жақсарып, ядролық жарылыстартың әсері із-түссіз жоғалды деп айтуға болмайды.
Еліміздің әрбір азаматтың өмірі мен денсаулығын қорғауды бірінші кезекке қоятын әлеуметтік мемлекет екенін ескерсек, онда ядролық жарылыстар болған кезеңде аталған аймақтарда тұрған, бірақ кейіннен түрлі жағдайда байланысты әр түрлі мәселелермен басқа өңірлерге қоныс аударған адамдар тиісті әлеуметтік қолдау шараларын алуға тиіс деп есептеймін. Осы орайда, құрметті Тамара Босымбекқызы, ядролық сынақ салдарынан зардап шеккен азаматтардың барлығына заңмен көзделген жеңілдіктер бірдей берілуі үшін аталған мәселені мүдделі мемлекеттік органдармен жан-жақты қарастыруды сұраймын, - деп айтты Жарқынбек Амантайұлы.
