BAQ.KZ тілшісі әлемде соңғы тәулікте болған оқиғаларға шолу жасап, жария болған жаңалықтар топтамасын назарларыңызға ұсынады.
Трамп АҚШ-қа көшуге арналған "алтын карталарды" енгізетінін мәлімдеді
Ақ үй басшысы Дональд Трамп АҚШ екі аптадан кейін Америкада тұруға және жұмыс істеуге мүмкіндік беретін, сондай-ақ америкалық азаматтық алуға жол ашатын "алтын карталарды" сата бастайтынын мәлімдеді, деп хабарлайды РБК.
Оның айтуынша, "алтын картаның" құны шамамен 5 миллион доллар болмақ.
Біз алтын картаны сатуды жоспарлап отырмыз. Сіздерде грин-карта бар, ал бұл – алтын карта. Біз оның бағасын шамамен бес миллион доллар көлемінде белгілейміз. Бұл сізге грин-карта беретін артықшылықтарды қамтамасыз етеді және азаматтық алуға жол ашады. Бай адамдар осы картаны сатып алып, біздің елге келеді, - деді Трамп 25 ақпанда Ақ үйдегі Овальды кабинетте журналистер алдында сөйлеген сөзінде.
Трамптың айтуынша, миллиондаған карта сатылады деп күтілуде. Ол бұл бастаманың заңды екенін ерекше атап өтті.
Трамп "Ресейлік олигархтарға "алтын карта" сатуға дайынсыз ба?" деген сұраққа да жауап берді.
Иә, мүмкін. Мен бірнеше ресейлік олигархтарды танимын, олар өте жақсы адамдар, - деп жауап берді АҚШ президенті.
АҚШ-тың Сауда министрі Говард Лютниктің түсіндіруінше, "алтын карта" шетелдік инвесторларға арналған EB-5 иммиграциялық визасын беру бағдарламасының орнына енгізіледі. Сонымен қатар, қазіргі қолданыстағы EB-5 бағдарламасы жабылады, деп мәлімдеді Трамп әкімшілігі.
DeepSeek жаңа ЖИ моделін шығаруды жеделдетуде
Reuters агенттігінің мәліметіне сүйенсек, қытайлық DeepSeek стартапы жасанды интеллект нарығындағы өз позициясын нығайтуды көздеп отыр. Қаңтар айында Ханчжоуда орналасқан компания R1 моделін ұсынды. Бұл модель Nvidia-ның қуаты төменірек чиптерінде жұмыс істесе де, батыстық технологиялық алыптар жүздеген миллиард доллар жұмсаған модельдермен бәсекелесе алды. Осы оқиға әлемдік қор нарығында 1 триллион доллардан астам қаражаттың сатылуына себеп болды.
Компания қызметімен таныс үш дереккөздің мәліметінше, DeepSeek R1 моделінің ізбасары – R2 моделін шығаруды жеделдетуде. Бастапқыда оны мамыр айының басында таныстыру жоспарланған, алайда компания мүмкіндігінше ертерек шығаруды көздеп отыр. R2 моделінің бағдарламалау қабілеті жоғарырақ болады деп күтілуде және ағылшын тілінен басқа бірнеше тілде ой қорыта алады.
DeepSeek компаниясы бұл мәліметтерге түсініктеме беруден бас тартты.
ЖИ индустриясындағы бетбұрыс
Сарапшылардың пікірінше, жаңа модельдің іске қосылуы жасанды интеллект саласында айтарлықтай өзгерістер әкелуі мүмкін. Үндістандық Zensar технологиялық қызметтерін жеткізуші компанияның операциялық директоры Виджаясимха Алилугхаттаның айтуынша, DeepSeek-тің шығынды аз талап ететін ЖИ модельдерін әзірлеудегі жетістігі басқа компанияларды да өз жобаларын жеделдетуге итермелейді және нарықтағы бірнеше ірі ойыншының үстемдігін әлсіретуі мүмкін.
Геосаяси әсері
R2 моделінің шығарылуы АҚШ үкіметін алаңдатуы мүмкін, себебі ел жасанды интеллект саласындағы көшбасшылықты ұлттық басымдық ретінде қарастырады. Сонымен қатар, бұл қадам Қытай билігі мен компанияларын белсендірек әрекет етуге ынталандыруы ықтимал. Қазірдің өзінде ондаған қытайлық компаниялар өз өнімдеріне DeepSeek модельдерін интеграциялауға кіріскен.
Мыңдаған канадалық Маскты азаматтықтан айыру туралы петицияға қол қойды
Канада мен Трамп әкімшілігі арасындағы шиеленістің аясында Илон Маскты канадалық азаматтықтан айыруды талап еткен петицияға жүздеген мың адам қол қойды, деп хабарлады ВВС агенттігі.
Бес күн бұрын қол жинау басталған бұл петицияда Маск Канаданың ұлттық мүдделеріне қайшы әрекеттер жасады және елдің егемендігін бұзды деп айыпталуда.
Канада заңдарына сәйкес, азаматтық тек алаяқтық жасаған, жалған ақпарат берген немесе иммиграция не азаматтық алу өтінішінде маңызды мәліметтерді әдейі жасырған жағдайда ғана күшін жоя алады. Оңтүстік Африкада туған Илон Маск Канада мен АҚШ азаматтығына ие.
Канада – нағыз ел емес, - деп жазды петицияға жауап ретінде Маск X (бұрынғы Twitter) платформасында.
Кейінірек бұл жазба өшіруге түсті.
Петицияда Маск "байлығы мен билігін біздің сайлауымызға ықпал ету үшін пайдаланды" және "Канаданың егемендігін жоюға тырысатын шетелдік үкіметтің мүшесі болды" деп мәлімделеді. Маск Канада азаматтығын Саскачеванда дүниеге келген анасы арқылы алған.
20 ақпанда жарияланған петицияға қазірдің өзінде 250 000-нан астам канадалық қол қойған. Қол жинау 20 маусымға дейін жалғасады.
Бұл бастама заңды күші жоқ символикалық әрекет болып саналады. Дегенмен, 500-ден астам қол жинаған және парламент мүшесінің қолдауына ие петициялар әдетте үкіметтің жауабын талап етеді. Бірақ көктемгі сайлау өтуіне байланысты парламент таратылса, бұл жолы жауап болмауы мүмкін.
Петицияны британдық Колумбия тұрғыны дайындап, оны Жаңа демократиялық партия депутаты Чарли Ангус мақұлдаған. Тимминс-Джеймс-Бэй округінен 20 жыл бойы депутат болған Ангус қайта сайлауға түспейтінін мәлімдеді.
