BAQ.KZ тілшісі әлемде соңғы тәулікте болған оқиғаларға шолу жасап, жария болған жаңалықтар топтамасын назарларыңызға ұсынады.
Трамп "Америка даусын" жабуды жоспарлап отыр
ВВС агенттігінің мәліметіне сүйенсек, АҚШ президенті Дональд Трамп "Америка дауысы" жаңалықтар ұйымын федералды қаржыландырудан айыру туралы жарлыққа қол қойды. Ол бұл ақпарат құралының қызметін "антитрамптық" және "радикалды" бағытта деп айыптады.
Ақ үйдің мәлімдемесінде бұл жарлық "салық төлеушілердің радикалды үгіт-насихат үшін ақша төлемеуін қамтамасыз етеді" деп жазылған. Сондай-ақ, саясаткерлер мен оңшыл бұқаралық ақпарат құралдарының "Америка дауысы" компаниясын сынаған пікірлері келтірілген.
Бастапқыда радио қызметі ретінде құрылған VOA (Voice of America) Екінші дүниежүзілік соғыс кезінде нацистік насихатқа қарсы тұру мақсатында жасақталған. Қазіргі уақытта бұл ұйым апта сайын бүкіл әлем бойынша жүздеген миллион адамға хабар таратады.
Ұйымның директоры Майк Абрамовиц өзінің және 1300 қызметкерінің ақы төленетін демалысқа жіберілгенін хабарлады. Ол бұл шешім "Америка дауысының" маңызды миссиясын атқаруына кедергі келтіретінін айтты.
Бұл әсіресе қазір өте маңызды, өйткені Иран, Қытай және Ресей сияқты Американың қарсыластары жалған ақпарат таратуға миллиардтаған доллар жұмсап жатыр, - деді Абрамовиц.
АҚШ журналистерінің жетекші ұйымы Ұлттық баспасөз клубы президент жарлығын "Американың еркін және тәуелсіз баспасөзді қолдауға деген ұзақ мерзімді ұстанымын бұзады" деп сынға алды.
Президенттің жарлығы VOA-ның бас компаниясы – АҚШ-тың Жаһандық Медиа Агенттігіне (USAGM) бағытталған. Бұл агенттік "Азаттық радиосы" мен "Азияның Азаттық радиосы" сияқты коммерциялық емес ұйымдарды қаржыландырады. Бұл ақпарат құралдары бастапқыда коммунизмге қарсы тұру үшін құрылған болатын.
Зеленский Мәскеуді "соғысты тоқтатуға ниеті жоқ" деп тағы да айыптады
Бұл туралы Deutsche Welle агенттігі хабарлады.
Соғысты тезірек аяқтағысы келетіндер бұлай істемейді, – деп мәлімдеді Украина президенті Владимир Зеленский.
Ол соңғы аптада Ресейдің Украинаға оннан астам зымыран және мыңнан астам соққы жасаушы дрон атқанын атап өтті.
Зеленский Ресейдің өзі бастаған агрессивті соғысты тоқтатуға мүдделі емес екенін тағы да айтты.
Осы аптада қалаларымыз бен елді мекендерімізге жүздеген шабуыл жасалды. Ресейліктер 1020-дан астам соққы дронын, шамамен 1360 басқарылатын әуе бомбасын және әртүрлі типтегі 10-нан астам зымыран ұшырды. Соғысты тоқтатқысы келетіндер бұлай әрекет етпейді, – деп жазды ол әлеуметтік желілерде.
Украина президенті әлемнің барлық өркениетті елдері Ресейге бірлесіп қысым көрсетуі керек екенін және жаңа "батыл шаралар", соның ішінде санкцияларды күшейту қажеттігін мәлімдеді.
Украина, Еуропа, Америка және бейбітшілікті қалайтын әлемнің барлық елдері бірге әділетті және ұзақ мерзімді бейбітшілікке қол жеткізе алады, – деді ол.
Үш күн бұрын Зеленский Кремльді АҚШ-тың бастамасымен әзірленген Ресей мен Украина арасындағы бейбіт келісімді әдейі созып отыр деп айыптаған еді.
Өкінішке қарай, (Джиддадағы кездесу өткеннен кейін) бір күннен астам уақыт өтсе де, Ресейден қандай да бір мәнді жауап естілген жоқ. Бұл тағы да Ресейдің соғысты жалғастыруды көздеп отырғанын және бейбітшілік орнауын барынша кешіктіруге тырысатынын дәлелдейді, – деп жазды ол 13 наурызда.
Зеленский сондай-ақ "АҚШ-тың қысымы Ресейдің соғысты тоқтатуы үшін жеткілікті болады деп үміттенетінін" айтты.
Ватикан Папа Францисктің аурудан кейінгі алғашқы суретін жариялады
88 жастағы Папа Франциск 14 ақпанда ауруханаға жатқызылғаннан бері көпшілік алдына шықпаған еді. Ватикан оның бір айдан астам уақыттан кейінгі алғашқы суретін жариялады, деп хабарлайды Sky News ақпарат агенттігі.
Фотода католик шіркеуінің басшысы жексенбі күні таңертең өзінің дұға бөлмесінде месса оқып отырған сәт бейнеленген. Ол мүгедектерге арналған арбада отырып, алтарь алдында күлгін түсті епитрахильмен (діни жоралғы киімі) көрінеді.
Суретте басқа ешкім жоқ.
Бүгін таңертең Папа Франциск Джемелли клиникасының 10-қабатындағы апартаменттеріндегі шіркеуде қасиетті мессаны өткізді, – делінген Ватиканның мәлімдемесінде.
88 жастағы понтифик Римдегі Джемелли ауруханасында ем қабылдап жатыр. Дәрігерлердің айтуынша, оның жағдайы қазір аса ауыр емес: 14 ақпанда ол бронхитпен ауруханаға түскен, кейін екі жақты өкпе қабынуы (пневмония) және полимикробты инфекция диагнозы қойылған.
Алайда дәрігерлер оның жасы мен қозғалысының шектеулі екенін ескеріп, денсаулығының әлі де күрделі жағдайда екенін атап өтті.
