Александр Бублик Кицбюэльде ATP 250 турнирінде чемпион атанды, деп хабарлайды BAQ.KZ.
Қазақстандық теннисші, әлемнің 30-шы ракеткасы Александр Бублик Австрияның Кицбюэль қаласында өткен ATP 250 санатындағы турнирде жеңіске жетті. Финалда ол әлемнің 100-ші ракеткасы, француз теннисшісі Артур Казоны 6:4, 6:3 есебімен жеңді.
Кездесу 1 сағат 24 минутқа созылды. Бублик матч барысында бес эйс орындап, жеті брейк-пойнттың үшеуін сәтті пайдаланды. Казо жеті эйс соғып, бес брейк-пойнттың тек бірін жүзеге асырды.
Бұл жеңіс Бубликтің мансабындағы жетінші ATP титулы және 2025 жылғы маусымдағы үшінші жүлдесі болды. Жаңартылған ATP рейтингінде ол 25-ші орынға көтеріледі.
