Нұр-Сұлтан, BAQ.KZ. Петропавл тұрғыны алаяқтарға алданып, сегіз миллионнан астам теңгесінен айырылды, деп хабарлады Polisia.kz.
Петропавл полицейлері сақ болуды және «банктің қауіпсіздік қызметінен қоңырау шалып тұрмыз» деген алаяқтардың құйтырқы әрекеттеріне сенбеуді сұрайды. Интернет алаяқтар Петропавлдың 44 жастағы тұрғынына сегіз миллион теңгеден астам шығын келтірген. Әйел «банктің қауіпсіздік қызметінен қоңырау шалып тұрмыз» деген алаяқтардың сөзіне сеніп қалған.
Бейтаныс дауыс оған шотында күдікті әрекеттер жүргізіліп жатыр деп хабарлаған. Ақшаны сақтап қалу үшін оны «қосалқы шотқа» аудару қажет деген. Әйел қылмыскерлердің нұсқауын орындап, барлық жиған-тергенінен айырылып қалған. Аталған факті ҚР Қылмыстық кодексінің 190-бабы 3-б. (Алаяқтық) бойынша Сотқа дейінгі тергеп-тексерулердің бірыңғай тізіліміне енгізілді. Полицейлер қала тұрғындарынан қаскөйлердің жалған сөздеріне сенбеуді сұрайды.
Қылмыскерлер сенімді, табанды түрде әрекет етіп, өз құрбандарының қаржы істеріне қатысты көп нәрсені білуі мүмкін. Қысымшылық көрсетіп, ақша аударуды немесе кодтар мен құпия сөздерді айтуды талап еткен жағдайлар да белгілі. Егер сіз өзіңіздің банк активіңізге біреудің қолсұғуына жағдай жасамаңыз, яғни құпия мәліметтеріңізбен бөліспесеңіз, онда қылмыскерлердің дәрменсіз екендігін естен шығармаған жөн. Қауіп туралы жақындарыңыз бен туыстарыңызды ескертіңіздер, алаяқтарға сенбеңіздер. Күмәнді жағдайларда өз шоттарыңыз жайлы нақты ақпарат алу үшін банкке жеке жүгініңіз, - дейді СҚО ПД Криминалдық полиция басқармасының бастығы Петр Климов.
