Әдебиет пен өнер қайраткерлеріне мемлекеттік стипендия табысталды

Мемлекеттік Кеңесшісі  Ерлан Қарин әдебиет және өнер қайраткерлеріне Мемлекет басшысының Өкімімен тағайындалған 2024 жылғы мәдениет саласындағы мемлекеттік стипендияны табыстады, деп хабарлайды BAQ.KZ тілшісі.

Жыл сайын тағайындалатын мемлекеттік стипендия – мемлекеттің мәдениет пен өнер қайраткерлеріне, шығармашылық қызметкерлеріне және жас дарындарға жасаған қолдауы мен қамқорлығының айғағы, сондай-ақ, олардың Қазақстанның мәдениетін өркендетіп, әлемге танытуға қосқан үлестеріне көрсетілген құрмет.

Өткен жылы мәдениет және өнер саласында түрлі маңызды шараларға толы болды. Сіздермен бірге атқарып өткіздік. Бердібек Соқпақбаевтың 100 жылдығы, Әбдіжәміл Нұрпейісовтің 100 жылдығы, Қаныш Сәтбаевтың 125 жылдығы одан басқа Сағадат Нұрмағамбетовтің 100 жылдығы сияқты осындай іс-шараларда өздеріңіз ортасында болып атсалыстыңыздар. Сіздермен өткен жылы күз айында осы жерде Мұхтар Әуезовке көтерілген тамаша ескерткіштің ашылуына бірге қатыстық. Яғни өткен жыл елімізде Мемлекет басшысының бастамасымен жүріп жатқан көптеген реформалармен қатар мәдениет өнер саласында да белгіленген жоспарларға сәйкес үлкен маңызды жұмыстар жүзеге асқан болатын. Биыл да күнтізбеде үлкен маңызды шаралар бар. Мемлекет басшысы жақында ”Ana tili” газетіне берген сұхбатында кеңірек атап өткен болатын. Ол сұхбат еліміздің  өткен жылдағы дамуын қорытындыласа, екінші жағынан 2025 жылда атқарылатын жұмыстардың бағыт-бағдарын берді. Еліміздің күн тәртібінде тұрған негізгі, өзекті мәселелерге қатысты бағдар бергег болатын. Сондықтан ол сұхбат төңірегінде жақсы пікір таластар болды. Жақсы ойлар айтылды, - деді Мемлекеттік Кеңесші Ерлан Қарин.

Мемлекеттік стипендия иегерлері қатарында  Төлен Әбдік, Асқар Әлібек, Мырзатай Жолдасбеков, Серік Тұрғынбекұлы, Қайрат Байбосынов, Алтыншаш Жағанова, Меруерт Өтекешова, Әкім Тарази, Қойшығара Салғараұлы, Жайымов Айтқали, Мырзабек Аманкелді, Әсия Беркенова, Ілия Жақанов, Жандарбек Мәлібекұлы, Жанғали Жүзбай, Айгүл Үлкенбаева және басқа да  қазақ әдебиеті мен өнерінің майталмандары бар. 

Сонымен бірге Канн халықаралық фестивалінің лауреаты Самал Есләмоваға, Жанат Жаңқашұлы, Медғат Өмірғалиев, Жадыра Байбұланова секілді және өзге де жас дарындарға мемлекеттік қолдау көрсетілді.

Мемлекеттік стипендия Қазақстанның 75 әдебиет пен өнер  қайраткеріне  берілді.