Жедел-профилактикалық іс-шара 9 маусымға дейін жалғасады, деп хабарлайды BAQ.KZ Абай облыстық Полиция департаментіне сілтеме жасап.
Елдің көші-қон заңнамасын бұзушыларды анықтау, сондай-ақ облыс аумағындағы заңсыз көші-қон арналарының жолын кесу мақсатында биылғы жылдың 3 маусымы мен 9 маусымы аралығында «Мигрант» жедел-профилактикалық іс-шарасы өткізіледі.
Тәртіп сақшылары шетелдіктердің өңір аумағына келуін, олардың шетелдік азаматтардың құқықтық жағдайы туралы заңнама талаптарын сақтауын бақылайды, ішкі істер органдарында уақтылы тіркелмеген заңсыз көшіп-қонушылар мен бұзушыларды анықтауға рейдтер жүргізеді.
Осыған байланысты құқық қорғау органдары барлық құрылыс нысандарын, базарларды, асханалар мен кафелерді міндетті түрде тексереді, - делінген хабарламада.
