Нұр-Сұлтан, BAQ.KZ. Ауыл шаруашылығы министрі Сапархан Омаров Ақмола облысына жұмыс сапары барысында «Бота-2015» ЖШС өсімдік майын өндіретін зауыт құрылысының барысымен танысты. Бұл туралы ведомствоның баспасөз қызметі хабарлады.
Жобаның құны - 4,2 млрд теңге. Болашақ зауыттың өндірістік қуаттылығы тәулігіне 600 тонна өнім өндіреді. Кәсіпорында өңірдің 30 тұрғыны еңбек ететін болады. Бұланды ауданының Макинск қаласындағы заманауи зауыт майлы дақылдарды қайта өңдеуді қамтамасыз етеді және дайын өнім өңделген түрде көрші елдер нары ғына экспортталатын болады. Осындай зауыттарды Шығыс Қазақстан облысында салу жоспарланып отыр, ал Алматы қаласында заманауи зауыт іске қосылды. Мұндай өндіріс орындарын салу – шикізат экспортына қарағанда құны жоғары, тереңдетіле өңделген өнім экспортына өтуге мүмкіндік береді.
Сонымен қатар, министр Макинск қаласында жергілікті элеватордың жаңа астық өнімін қабылдауға дайындығын тексерді. «Арна» астық қабылдау кәсіпорны» ЖШС аудандағы фермерлерге астық қабылдау, кептіру, тазалау, сақтау және жөнелту бойынша қызмет көрсетеді.
Кәсіпорынның жалпы ауданы – 14,7 га. Бұл жерде сыйымдылығы 22 мың тонналық астық қоймасы, ауданы 4,5 мың шаршы метр асфальтталған алаң, өнімділігі сағатына 110 тонна астық кептіргіш бар. Қазіргі уақытта элеватор жаңа астықты қабылдауға толық дайын.
