108 адам карантинге жатқызылды

26 Қазан 2020, 09:45
1303
Бөлісу:
108 адам карантинге жатқызылды

Нұр-Сұлтан, BAQ.KZ. Қазанның 25-інен 26-сына қараған түні халықаралық рейстер бойынша елорданың әуежайына 6 ұшақ келіп қонды, деп хабарлайды ҚазАқпарат. 

Әуе рейстерін Air Astana, Turkish Airlines,Belavia және Flydubai әуе компаниялары орындаған. Келген 722 жолаушының ішінде 108-інде ПТР-тест анықтамасы болмаған. Олардың бәрі де стационарлық карантинге жатқызылды. 

ПТР-тесттен өткеннен кейін аталмыш жолаушыларда вирус анықталмаса үйіне, анықталса инфекциялық стационарға барады. 

2020 жылдың 27 қазанынан бастап ҚР бас мемлекеттік санитарлық дәрігер Ерлан Қиясовтың жаңа қаулысы күшіне енеді. Оған сәйкес мемлекеттік шекаралардағы өткізу пунктерінде коронавирус инфекциясының таралуын болдырмау мақсатында шаралар күшейтілмек. 

Жаңа қаулы бойынша Қазақстанға келген азамат кем дегенде үш күн бұрын ПТР-тесттен өткені туралы анықтаманы тапсыруы керек. 5 жасқа дейінгі балалардан бұл талап етілмейді. Алайда кішкентай баланы алып жүрген өкілінде осындай анықтама болуы тиіс. Халықаралық транзиттік жолаушылар транзиттік аумақтан кетпеуі керек. Әуе компанияларының басшылары қонған әуе кемесінің бортына ПТР-анықтамасы жоқ шетел азаматтарын кіргізбеуі тиіс.



Өзгелердің жаңалығы