Бүгін елордалық БАҚ өкілдері далалық оқу-жаттығу лагерінде болып, Жеңіс шеруіне дайындық қалай жүріп жатқанын көріп қайтты, деп хабарлайды BAQ.KZ тілшісі.
Әскерилердің оқу-жаттығу лагерінде шеруге дайындық қызу жүріп жатыр.
Бұл баспасөз-турын Қорғаныс министрлігі ұйымдастырды. Ведомствоның мәліметінше, Жеңіс шеруі 7 мамыр күні өтеді.
Шеруді елордалықтар мен қала қонақтары Астананың бас алаңынан тамашалай алады.
Дәл қазір Астанада өтетін әскери парадқа 4000-нан астам әскери қызметші дайындалып жатыр.
Әскерилер еліміздің түкпір-түкпірінен елордаға 31 наурыз күні жиналған. Сөйтіп олар 1 сәуірден бастап дайындық жұмыстарын бастап кеткен.
Құрлық әскерлері бас қолбасшысы, генерал-майор Мереке Көшекбаевтың айтуынша, бүгінде әскери бөлім алаңында шеруге дайындық жақсы деңгейде жүріп жатыр.
Шеру – ол еліміздің бас алаңында өтетін салтанатты шеру ғана емес, сонымен бірге ұрпақтар сабақтастығының әскери ерлігін, халқымыздың батырлығын бейнелейтін дәстүр. Қазіргі таңда әскериге шеруге дайындық бекітілген жоспар бойынша жүріп жатыр. Биыл шеруге қатысуға 4000-нан астам әскери қызметші дайындалып жатыр. Олардың 200-ден астамы әйел. Шеруге 300-ден астам әскери техника мен авиация қатысады, - деді Мереке Көшекбаев.
Әскери полигонда күн сайын саптық жаттығулар, бөлімшелер арасындағы үйлесімділік пен қозғалыс дәлдігін пысықтау жалғасып жатыр. Бұл – тек техникалық шеберлік емес, сонымен қатар тәртіп пен рухтың көрінісі. Себебі Жеңіс шеруі – әскери қуатты ғана емес, елдің ерлігі мен тарихи жадының символы.
Журналистер сарбаздардың әр қадамын мұқият пысықтап жатқанын, танк пен әскери техникалардың парадтық қозғалысын, оркестрлердің музыкалық сүйемелдеуін көруге мүмкіндік алды.
Біз үшін шеруге қатысу – үлкен құрмет пен зор жауапкершілік. Бұл – тек форма мен техниканы дайындау емес, бұл – жеңімпаздардың рухын жеткізу, – дейді әскери қызметшілер.
Парад үш кезеңнен тұрады.
Біріншісі – Ұлы Отан соғысы жылдарын қоса алғанда, жаяу салтанатты есептоптардың өтуі. Ту топтары Тәуелсіздік алаңымен Жауынгерлік Қызыл Туды, Қазақстан аумағында құрылған дивизиялардың туларын алып өтеді.
Сонымен бірге қару асынған және соғыс жылдарындағы киім үлгісімен екі салтанатты есептоп жүріп өтеді.
Қазіргі бөлімде Қарулы күштердің үш түрі, Арнайы операциялар күштері, Десанттық-шабуылдау әскерлері, теңіз жаяу әскерлері, әскери полиция, бітімгерлік бөлімшесі, әскери қызметші әйелдер қорабы, аумақтық қорғаныс және әскери оқу орындары ұсынылған 23 жаяу парадтық есептоптың өтуі жоспарланып отыр.
Салтанатты шараға Ұлттық ұланның, Төтенше жағдайлар министрлігінің және Мемлекеттік күзет қызметінің бөлімшелері қатысады.
Әрбір салтанатты есептоп 156 әскери қызметшіден тұрады. Шеру соңында 300 музыканттан құралған біріккен әскери оркестрдің дефилесі өтеді.
Астанадағы әскери парадта жауынгерлік техника мен авиацияның заманауи үлгілері көрсетіледі Жеңістің мерейтойлық шеруі барысында Қазақстан әскерінің, Ұлттық ұланның, Мемлекеттік күзет қызметінің және Төтенше жағдайлар министрлігінің қарулануында тұрған заманауи техника көрсетіледі.
Олардың ішінде «Арлан», «Cobra» сауытты дөңгелекті машиналары, «Стрела-10», «ТОР» және «БУК» зениттік зымыран кешендері, БТР-82А, «Алмаз» және «Агат» мобильді кешендері, «TEODor» роботехникалық кешені, есептеу-талдау станциясы, «EVO» Max 4T», «Skylark» ұшқышсыз ұшу аппараттары және қару-жарақ пен әскери техниканың басқа да жоғары технологиялық үлгілері бар.
Әуе шеруіне Қарулы күштердің армиялық, майдандық және әскери-көліктік авиациясының, Ұлттық қауіпсіздік комитетінің және Қазақстан Республикасы Төтенше жағдайлар министрлігінің 60-тан астам ұшу аппараттары қатысады.
Мереке Көшекбаев елордадағы бас алаңда 3-5 мамыр күндері шеруге жалпы дайындық өтетінін айтты.
.jpg)
0
0
0
0
0
