Астанада «Жасыл кеңсе» республикалық байқауының жеңімпаздары марапатталды, деп хабарлады BAQ.KZ.
Конкурсты Экология, геология және табиғи ресурстар министрлігінің және Астанадағы ЕҚЫҰ бағдарламалар кеңсесінің қолдауымен «Жасыл» экономиканы қолдау және G-Global дамыту Коалициясы» ЗТБ ұйымдастырды.
Байқау жасыл технологияларды, озық тәжірибенің үздік үлгілері мен экологиялық жауапты ұйымдардың жұмысын насихаттауға бағытталған.
Конкурсқа өтініштер 8 номинация бойынша қабылданды:
1) Білім беру;
2) Денсаулық сақтау;
3) Мемлекеттік органдар мен квазимемлекеттік сектор;
4) Бизнес-құрылымдар;
5) Кәсіпорындар;
6) Бизнес және сауда орталықтары;
7) Қаржы ұйымдары;
8) Үкіметтік емес ұйымдар.
Байқауға барлығы 100-ге жуық өтінім түсті. Нәтижесінде үздік 26 жеңімпаз анықталды: Павлодар қаласындағы №36 мектеп, Балалар-жасөспірімдер экология және туризм орталығы, М. Катаев атындағы Оқушылар сарайы, Ебіней Бөкетов атындағы Қарағанды мемлекеттік университеті, Астана қаласындағы №83 мектеп-гимназия, Ақтау қаласындағы Шахмардан Есенов атындағы Каспий мемлекеттік технологиялар мен инжиниринг университеті және тағы басқа.
Марапаттау рәсіміне Мәжіліс депутаты Елдос Абаканов, Экология, геология және табиғи ресурстар вице-министрі Зүлфия Сүлейменова, Астанадағы ЕҚЫҰ бағдарламалар кеңсесінің өкілі, «Жасыл» экономиканы қолдау және G-Global дамыту Коалициясы» ЗТБ атқарушы директоры Асхат Сүлейменов қатысты.
