Мәдениет және спорт министрлігінің Архив істері және құжаттаманы басқару комитетінің бастамасымен Қолжазбалар және сирек кітаптар ұлттық орталығы ашық есік күнін өткізді, деп хабарлайды BAQ.KZ тілшісі.
«Архив және болашақ ұрпақ» жобасын іске асыру аясында өткен ашық есік күніне Астана қаласының оқушылары мен студенттері қатысты.
Бүгінгі ашық есік күнінің мақсаты – Қолжазбалар және сирек кітаптар ұлттық орталығының жұмысын көрсетіп, жастарға салт-дәстүрімізді дәріптеу, патриоттыққа шақыру. Сондай-ақ балаларды жыртылған қолжазбаларды қалпына келтіру және сандық форматқа көшіру жұмыстарымен таныстыру, - деді орталық директоры Жандос Болдықов.
Ашық есік күніндегі сурет көрмесінде халқымыздың салт-дәстүрлеріне, киіз үй құрылымына, ұлттық аспаптар тарихына шолу жасалды. Оған қоса келушілер «Ұлы даланың жазба мұралары» көрмесімен де танысты. Балаларға викториналық сұрақтардан сайыс ұйымдастырылып, бүлінген қағаздарды қалпына келтіру бойынша шеберлік сағаты өткізілді.
Жастарымыз қолжазбалар туралы біле бермейді. Біздің қолжазбалар руна, парсы, араб, көне түрік, шағатай тілдерінде жазылған. Қазір арабша жазуды Құран кітап деп қабылдайды. Өйткені араб тілін оқитын мамандар аз. Алайда арабша жазбалар заң жинақтары, әдеби шығармалар да болуы мүмкін. Сол кітаптарды арнайы арабтанушы, шығыстанушы мамандар анықтап, зерттеп, сипаттама жасап, мұраның ары қарай сақтау жолдарын қарастырамыз, - деді ұлттық орталықтың Есепке алу, сақтау, көрме және оқу залдары бөлімінің басшысы Анар Баймағамбетова.
