Нұр-Сұлтан, BAQ.KZ тілшісі. Елордада ашылған Жастарға қызмет көрсету орталығы жастардың ең жиі қоятын сұрақтарына жауап береді.
Айта кетейік, елордада Ескі вокзал ғимаратына қарама-қарсы жерде Жастарға қызмет көрсету орталығы жұмыс істейді.
Нұр-Сұлтан қаласы әкімдігі «Астана жастары» жастар ресурстық орталығы басшысының орынбасары Аян Ерментаев жастар қандай сұрақ бойынша орталыққа жиі жүгінетінін айтып берді.
Ең өзекті мәселе – жұмыспен қамтамасыз ету. Барлығы тұрақты жұмыс іздейді. Сол себепті біз Жұмыспен қамтамасыз ету орталығымен ғана емес, сонымен қатар «Атамекенмен» де бірлесіп жұмыс істейміз. Бизнес ашқысы келетіндер үшін мүмкіндіктер қарастырылған, - деді ол.Сонымен қатар спортпен шұғылданғысы келетін жастар да бар. Олар үшін де орталықта мүмкіндіктер бар.
Нұр-Сұлтан қаласы бойынша «Аула клубтары» жобасы жұмыс істейді. Аталған жоба аясында 3 мыңға жуық жас пен жасөспірім тегін спорттық және мәдени үйірмелерге қатысты. Мәселен, бокс, карате, сурет салу, т.б. Орталыққа осындай мәселемен келген жастарға да бағыт-бағдар береміз. Қай жерде үйірме, қандай мүмкіндер барына жөн сілтейміз, - деп атап өтті Аян Ерментаев.Сонымен қатар тұрғын үй мәселесі бойынша кеңес алғысы келетін жастар болса, оларға да «Отбасы» банкінің мамандары тегін кеңес береді.
Еске сала кетейік, орталықтың жұмыс уақыты дүйсенбі-жұма күндері сағат 9:00-18:00-ге дейін істейді. Сенбі-жексенбі күндері - демалыс.
