Нұр-Сұлтан, BAQ.KZ. Жамбылда 2020 жылы 18 инвестициялық жоба жүзеге асырылады деп жоспарлануда. Бұл туралы аймақ басшысы Бердібек Сапарбаевтың төрағалығымен өткен аппараттық кеңесте айтылды. Жиында облыс әкімдігінің баспасөз қызметінің хабарлауынша, өнеркәсіп пен шағын және орта бизнесті дамыту мәселелері қаралған.
Облыс әкімінің орынбасары Нұржан Календеровтің мәліметінше, ағымдағы жылдың қаңтар-ақпан айларындағы өнеркәсіп өндірісінің нақты көлем индексі өткен жылдың көрсеткішінен 84 пайызға жоғары деңгейде қалыптасады деп болжанған. Дегенмен, химия өнеркәсібіндегі көрсеткіш төмен. Оған "Қазфосфат" ЖШС пештерінің бірінің істен шығуы және "Talas Investment Company" ЖШС зауытындағы бірқатар жөндеу жұмыстары себеп болып отыр. Ал азық-түлік саласындағы көрсеткіштің төмендеуі ресейлік арзан қанттың құйылуына байланысты Тараз және Меркі қант зауыттарының жұмысының тұралауымен түсіндірілді. Бұл орайда мәселені шешу үшін заңнамалық деңгейде тиісті шаралар қабылдау қажеттігі айтылды.
Сондай-ақ бүгінде "Амангелді ГӨЗ" ЖШС бүгінде өзінің жалпы қуаттылығының бар-жоғы 20 пайызында ғана жұмыс істеуде десек, осы тұрғыда кездесіп отырған кедергіні энергетика министрлігімен бірлесіп шешу, қажетті шикізатпен қамтамасыз ету мәселесі көтерілді. Ал "Жамбылгипс" ЖШС қоймаларында жиналған екі мың тонна дайын өнімді сатуда қиындық туғызуда екен. 2018 жылдың маусым айында жұмысын тоқтатқан "Хантау" цемент зауыты Қазақстанның инвестициялық қорына өткен. Бүгінде жаңа инвесторлар іздестірілуде.
Сонымен қатар, "ТаразКожОбувь" ЖШС-нің жұмысын жандандыру мәселесі сөз болған.
Ағымдағы жылы жалпы құны 88 млрд теңге болатын 18 инвестициялық жобаны іске асыру көзделуде десек, оның 11-і индустриалдық картаға енгізілген. "Қарапайым заттар экономикасы" бағдарламасы аясында "Қазфосфат", "Talas Investment Company", "Суперфарм", "Мерке ірімшік зауыты", "Агроспецстрой" және "Mark of Perfection"ЖШС кәсіпорындарында өндірісті кеңейту жоспарлануда.
Өнеркәсіп экономиканы дамыту жолында негізгі күшке ие. Әрбір басшы кабинетте отырмай кәсіпорындармен тығыз жұмыс жасап, олардың мәселелерін зерделей отырып, шешуге көмек көрсету қажет. Қант зауыттарының жұмысын жандандыру бойынша ұсыныстарды әзірлеңіздер олардың шаруалар алдындағы борыштарын өтеу жоспар-кестесінің орындалуын бақылауды күшейту қажет. Министрліктермен тығыз байланыста жұмыс істеп, аяқ киім тігуші кәсіпорынмен келісім-шарт орнату керек. Басты міндет - адамдардың табысын арттыру, жаңа жұмыс орындарын ашу және жалақыны арттыру, - деп атап өтті аймақ басшысы.
Қазіргі таңда шағын және орта кәсіпкерлік саласында өңірде белсенді 70,1 мың субъект тіркелген десек, онда 125 мың адам жұмыс істеуде. Олармен 2019 жылы шығарылған өнімнің болжамдық көрсеткіші 500 млрд.теңгені құрап отыр. Ағымдағы жылы белсенді субъектілер санын 76 мыңға дейін жеткізу көзделуде десек, ал олардың өңірлік жалпы өндірістегі үлесін қазіргі 20,5-тен 23 пайызға дейін арттыру жоспарланып отыр.
Облыс әкімі жауапты тұлғаларға "Бизнестің жол картасы-2020 " және "Еңбек" бағдарламалары аясында өткен жылы берілген гранттардың тиімді игеруіне талдау жасауды тапсырды. Ағымдағы жылы осы орайда бөлінген қаражат көлемін арттыру жайын қайта қарау қажеттігі айтылған.
Сондай-ақ өңірлік үйлестіру кеңесі мақұлдаған 11 жобаны инфрақұрылыммен қамтамасыз етудің де маңыздылығы да талқыланған.
Басқосу барысында Б.Сапарбаев субсидия алған ауыл шаруашылығы тауарын өндірушілердің 20 пайызын жергілікті қайта өңдеу кәсіпорындарына немесе 10 пайыздан аспайтын үстеме бағамен тікелей нарыққа жіберуі туралы ұсынысты қолдады. Болжам бойынша бұл әлеуметтік маңызы бар тауарлардың бағасын олардың негізсіз өсіруіне жол бермейді.
Сондай-ақ Бердібек Сапарбаев бизнес саласында өңірдің көрсеткіштерін жақсарту үшін жауапты мамандарға нақты шаралар қабылдауды тапсырған.
