Нұр-Сұлтан, BAQ.KZ. Осыған дейін егін егіп, диқаншылықпен айналысқан Жамбыл облысы Жуалы ауданының тұрғыны Қанат Жұманов бұлақ суынан жиналған бассейінде 35 мың форель шабағын өсіруде. Ол жылы бассейнде өсіріліп жатқан шабақтан 30 тоннадай балық аулауды межелеп отыр.
Бұл туралы Өңірлік коммуникациялар қызметі хабарлады.
Жуалы ауданында «Ислам» шаруа қожалығы облыста алғашқылардың бірі болып форель балығын өсірумен айналысуда. Бұл кәсіпті қолға алған кәсіпкер Қанат Жұманов Диқан ауылының сыртындағы тоғанға бассейн салып, оған форель балығының екі және бір айлық шабақтарын жіберген.
Балық шаруашылығын қолға алғаныма үш ай болды. Отбасылық қожалығымызды 1990 жылы құрғанбыз. Қазіргі таңда қожалықты ағам Ілияс басқаруда. Бұған дейін егін және мал шаруашылығымен айналысып келдік. Енді, міне, отбасыммен ақылдаса келіп, балық өсіруге бел будық, - дейді кәсіпкер.
Қанаттың бастамасына жергілікті билік те қолдау білдіріпті. Ақсай ауылдық округінің әкімдігі Диқан ауылының сыртынан жер телімін бөліп берген. Кәсіпкер ол жерге қаржы салып, бастау басына бассейін салады. Ол бассейнге шабақты Алматы облысынан әкеліп жіберіпті.
Балықтың жемін Алматыдан алдырамын. Ал Алматыға ол шет мемлекеттерден әкелінеді. Өзімізде арнайы жем дайындау қоры болмағандықтан осылай жұмыс істеуге мәжбүрміз. Форель - ерекше күтімді қажет етеді. Сондықтан оған берілетін азықтық жемнің түріне қарай бағасы да әр алуан. Келісі 950 теңгеден басталып, 2 мың теңгеге дейін барады. Бір барғанда, балықтың екі-үш апталық қорегін бір-ақ алып келемін. Бассейннің суын 18 градустан төмен түсірмейміз. Судың тазалығы - басты орында. Яғни, бассейнге келіп жатқан су бір жағынан құйылып жатса, екінші жағынан арна қуалап, ағып кетеді. Осылайша, су тоқтаусыз тазаланып тұрады. Шабақтар қысқа мерзімде өсіп-жетілсе, күзде сатылымға шығаруға жарап қалады, - дейді Қанат Жұманов.
Кәсіпкердің айтуынша, бұл шаруамен айналысу үшін ол қаржы ұйымдарынан 7 миллион теңге несие алған. Кәсібін кеңейтуді жоспарлап отырған Қанат тағы бір бассейннің құрылысын жүргізуде. Қазір онда бес адам жұмыс істейді. Бұл бассейннің құрылысын аяқтаған соң оған 100 мың форель, 2000 бекіре шабағын әкеліп жіберуді жоспарлауда.
Қанат өз өнімімен өз облысымызды ғана қамтып қоймай, Алматы қаласы мен Алматы облысының тұрғындарына да жеткізуді жоспарлауда.
