Қазақстанда зейнетақы жинақтарын тиімді пайдалану арқылы болашақтағы қаржылық тұрақтылықты қамтамасыз етуге болады, деп хабарлайды BAQ.KZ.
2021 жылдан бастап, Бірыңғай жинақтаушы зейнетақы қорындағы (БЖЗҚ) жинақтардың бір бөлігін белгілі мақсаттарға мерзімінен бұрын пайдалану мүмкіндігі берілді.
Зейнетақы жинақтарын пайдалану мақсаттары:
1. Тұрғын үй жағдайын жақсарту:
• Ипотекалық қарызды өтеу: Жинақтарды қолданып, қолданыстағы ипотекалық несиені толық немесе ішінара жабуға болады.
• Тұрғын үй сатып алу: Жинақтарды жаңа немесе екінші нарықтан пәтер, жеке үй немесе жатақханадан бөлме сатып алуға пайдалану мүмкіндігі бар.
• Жеке тұрғын үй салу: Жер телімін сатып алу және жеке үй құрылысын жүргізу үшін жинақтарды қолдануға болады.
2. Емделу шығындарын өтеу:
• Қазақстан аумағында медициналық қызметтер алу үшін жинақтарды пайдалану мүмкіндігі қарастырылған.
Зейнетақы жинақтарын пайдалану тәртібі:
1. Қолжетімді соманы анықтау:
• БЖЗҚ сайтындағы жеке кабинетке кіріп, жинақтардың жеткіліктілік шегінен асатын бөлігін тексеру қажет.
2. Арнайы шот ашу:
• “Отбасы банк” арқылы зейнетақы төлемдерін алу үшін арнайы шот ашу керек.
3. Өтінім беру:
• enpf-otbasy.kz платформасы арқылы қажетті мақсатты таңдап, өтінім жіберу қажет.
4. Қаражатты пайдалану:
• Қаражат шотқа түскеннен кейін, оларды 20 жұмыс күні ішінде тұрғын үй сатып алу немесе 45 жұмыс күні ішінде емделу мақсаттарына жұмсау керек.
Сондай-ақ маңызды ескертудің бірі салық салынатындығы. Біржолғы зейнетақы төлемдеріне жеке табыс салығы (ЖТС) салынады. Салымшы өтінім берген кезде салықты бірден толық төлеу немесе зейнетке шыққаннан кейін ай сайын бөліп төлеу тәсілін таңдай алады.
Екіншісі инвестициялық басқаруға беру: Салымшылар жинақтарының бір бөлігін инвестициялық портфельді басқарушыларға (ИПБ) сенімгерлік басқаруға бере алады. Бұл үшін БЖЗҚ-ға өтініш беру қажет.
Зейнетақы жинақтарын тиімді пайдалану арқылы сіз өзіңіздің тұрғын үй жағдайыңызды жақсартып, денсаулығыңызды нығайта аласыз, сондай-ақ қаржылық тұрақтылығыңызды қамтамасыз ете аласыз.
