Украина президенті Владимир Зеленский бейбіт келіссөздерге арналған украиналық делегацияның құрамын бекітті, деп хабарлайды BAQ.KZ.
Тиісті тізім арнайы жарлықпен ресми түрде жарияланды.
Құжатқа сәйкес, Украина делегациясының құрамына Президент әкімшілігінің басшысы Андрей Ермак, Сыртқы істер министрі Андрей Сибига, Қорғаныс министрі Рустем Умеров және Президент кеңсесі басшысының орынбасары Павел Палиса кіреді.
Делегацияны Ермак басқарады. Оған Украина сыртқы істер министрімен келісе отырып, делегация құрамына өзгерістер енгізу және мемлекеттік органдардың қызметкерлерін, сарапшылар мен ғылыми кеңесшілерді тарту құқығы берілген.
Бұған дейін Украина 30 күндік атысты тоқтату келісіміне келіскен болатын. АҚШ мемлекеттік хатшысы Марко Рубионың айтуынша, осы уақыттан кейін бейбіт келіссөздер басталады.
