Украина президенті Владимир Зеленский АҚШ-пен пайдалы қазбалар жөніндегі келісім жобасы туралы мәліметтердің таралуын тергеуді Украина Қауіпсіздік қызметіне (СБУ) тапсырды, деп хабарлайды BAQ.KZ.
Бұл тапсырма Киев пен Вашингтон арасындағы маңызды минералдар мен энергетикалық активтерге қатысты ұсынылған келісім шарттары бойынша шиеленістің күшеюі аясында берілді.
“Украинская правда” басылымының мәліметінше, украиналық шенеуніктер АҚШ-тың соңғы талаптарының ауқымына таңғалып, кейбір бөліктерін саяси тұрғыдан қолайсыз деп санайды.
“Украиналық шенеуніктер бірнеше министрліктің қызметкерлеріне полиграф қолданылғанын хабарлады, бірақ қосымша мәлімет беруден немесе қанша адамның сұралғанын айтудан бас тартты”, – делінген мақалада.
Украина президентінің кеңсесі бұл ақпаратқа түсініктеме беруден бас тартты. Қауіпсіздік қызметінің мәлімдемесінде олар Украина қауіпсіздігін қорғау үшін заң аясында әрекет ететінін және қызметінің кейбір егжей-тегжейлерін құпия сақтайтынын атап өтті.
Тергеу 26 наурызда оппозициялық депутат Ярослав Железняктың келісім жобасының егжей-тегжейін жариялауынан кейін басталды. Ол құжаттың көшірмесін алғанын мәлімдеп, құжатта АҚШ тарапынан қауіпсіздік кепілдіктері туралы “ешқандай белгі” жоқ екенін айтты.
Бұған дейін Украина сыртқы істер министрі Андрей Сибига НАТО штаб-пәтерінде АҚШ мемлекеттік хатшысы Марко Рубиомен келіссөздер жүргізіп, онда Украинадағы “энергетикалық бітім” және жер қойнауы туралы келісім талқыланғанын хабарлады.
Еске салайық, АҚШ президенті Дональд Трамп Украина президентті минералдар жөніндегі келісімнен “бас тартуға тырысты” деп айыптап, егер Зеленский келісімге қол қоймаса, “үлкен мәселелерге” тап болатынын мәлімдеді.
