Нұр-Сұлтан, BAQ.KZ. Дохада өтіп жатқан үстел теннисінен Азия чемпионатында екінші жарыс күні басталды. Бүгін қазақстандықтар командалық турнирдегі шешуші матчтарды өткізіп жатыр, деп хабарлайды Olympic.kz.
Қазақстан әйелдер командасы Иран құрамасын 3:1 есебімен ұтып, алғашқы сегіз команданың қатарына жолдама алды.
Біздің команда намысын Сарвиноз Миркадырова, Зәуреш Ақашева, Анастасия Лаврова мен Анель Бақыт қорғауда. Кеше қыздар құрамасы Бангладеш пен Шри-Ланкаға қарсы ойнап, 3:0 есебімен ұтқан болатын.
Кирилл Герасименко, Алан Құрманғалиев, Айдос Кенжеғұлов, Ырысбек Артықметовтен құралған ерлер командасы финалға жолдама алу үшін бар күшін салуда. Олар кеше Бахрейнді 3:0 есебімен ұтты, енді Таиланд командасымен кездеседі.
