Нұр-Сұлтан, BAQ.KZ. Ұлытау ауданында өткен оқушылар арасындағы ат жарысында бірінші орынды 15 жасар шабандоз Қыран Серік жеңіп алды. Ол бесінші сыныптан бастап осындай жарыстарға қатысып, жүлделі орындарға ие болып келеді.
Тай жарыста 15 шабандоз жарысты.
Ұлттық спорт түрлерін, соның ішінде ат спортын дамыту – Ұлытау ауданы үшін маңызды міндет. Біз кішкентай кезінен бастап балаларға атқа, ат жарысына деген сүйіспеншілікті сіңіруге тырысамыз, сол арқылы оларда спорттық рух пен көшбасшылық қасиеттерді тәрбиелейміз. Тай жарыс жергілікті әкімдік пен тұрғындардың қолдауымен ұйымдастырылды, – деп атап өтті шараны ұйымдастырушылар.
Жарысқа қатысушылар белгіленген шеңберді төрт рет айналып өтуі керек еді. Бұл қашықтықты алғаш болып 15 жастағы Қыран Серік жүріп өтті.
Қыран бала кезінен жылқыларды жақсы көреді. Бұл менің әкемнің балама сіңдірген ерекше махаббаты. Әкем оны тек атқа отыруды ғана емес, сонымен бірге жылқыны жаратуды, баптауды да үйретті. Ауылда менің ұлымды және ол асау аттарды үйрететінін бәрі біледі. Ауданымызда ұлттық спорт түрлері дамып келе жатқанына қуаныштымын. Бұл балаларды тәрбиелеуге көмектеседі, – деді оқушының анасы Гүлсұлу Балдуова.
Бірінші орын үшін Қыранға теледидар сыйға тартылды. Сондай-ақ, "Сарын Сай" шаруа қожалығының басшысы Асқар Бектемісов жас шабандозға 100 мың теңге көлемінде ақшалай сыйлық табыс етті.
Екінші және үшінші орындарды ағайынды шабандоздар Әсет пен Серікболсын Сайлау алды. Жеңімпаздар мен қатысушылар бағалы сыйлықтармен марапатталды.
