Түркістанды абаттандыруға аудандар көмектесуде

20 Қараша 2020, 10:30
1332
Бөлісу:
Түркістанды абаттандыруға аудандар көмектесуде

Нұр-Сұлтан, BAQ.KZ. Арыс тәжірибесін негізге ала отырып, 32 секторға бөлінген Түркістан қаласында жыл басынан бері абаттандыру жұмыстары қызу жүргізілуде. Бірқатар секторлардың жұмысын аралаған облыс әкімі Өмірзақ Шөкеевке аудан басшылары атқарылған жұмыс барысы жөнінде баяндады.

Мысалы, Ордабасы ауданына 13 көше, Төлеби ауданына 11 көше және  Түлкібас ауданына 9 көше бекітілген. 8 шақырымға созылған көшелерге ағаш, газон егу және тамшылап суғару жүйесін орнату жоспарланған. Жоспарланған 12 мыңға жуық көшеттің 96,2%-ы отырғызылған. Қараша айының аяғына дейін терек, үйеңкі, ірі жапырақты қарағаш, арша ағашы мен раушан гүлдері егіледі.

Түлкібастықтар өздеріне бекітілген секторда сенбілік өткізіп, 9 көшені тазалады. 7 мың түп жасыл желек пен газон егілді. Сондай-ақ, орталық Дастанов көшесіне жаңадан суару жүйесі орнатылды.

Сайрам ауданының секторында 8,48 шақырымды құрайтын 9 көшеде 7655 көшет отырғызылды. Ауданға бекітілген №2 секторда тұрақты түрде сенбілік жұмыстары ұйымдастырылып, жерді тегістеу, шұңқыр қазу, көшет егу жұмыстары жүргізілді. Қазылған ұяшықтарға топырақ салынып, көшет тамырын ылғалдандыратын гидрогель және топырақты қопсыту үшін биогумус себілуде. Сонымен қатар, көшеттерді суғару жүйесі жүргізіліп, газон егіледі.

Шардара ауданына бекітілген аумақта да көшеттер отырғызылып, гүлдер егілген. Айнала күл-қоқыстан тазартылып, тиісті жұмыстар қарқынды жүруде.

Түркістан қаласын көгалдандыруға Төлеби ауданы да атсалысыа жатыр. Аудан басшысының бақылауымен, 7354 ағаш көшеттерін егу, көшеттерді суғару үшін 12 119 метр тамшылатып суғару жүйесін жүргізу және 5 дана ұңғыма қазу жұмыстары атқарылуда. Бұл бағыттағы жұмыстар өз жалғасын тауып, қала аумағында 7 мыңнан астам арша, терек, қара ағаш көшеттері отырғызылмақ, - деп хабарлады Түркістан облысы әкімінің баспасөз қызметі.

Шаһарды көгалдандыру аумағы 187 га құрайды. Саябақтарды жайқалтып, гүлзарларды көркейту, желекжолдар мен тұрғын үй орамдарын, қоғамдық ғимараттарды көгалдандыру іске асып жатыр.

Қаланың климаттық жағдайын ескере отырып, қала сыртында көгалдандырудың үздіксіз жүйесін және Сырдария өзенінің табиғи өсімдіктер дүниесімен қосылуды қамтамасыз ететін жасыл белдеуді қалыптастыру көзделген.


Өзгелердің жаңалығы