Астана, BAQ.KZ. Биыл наурыз айында «Тұрғын үй-коммуналдық шаруашылығын жаңғырту мен дамытудың қазақстандық орталығы» АҚ, «Үлгілік және тәжірибелік жобалау ғылыми-зерттеу институты (ҮТЖҒЗИ)» ЖШС және «AINS Group» ЖШС өткен жылдың қазан айында Мемлекет басшысының Финляндияға сапары аясында қол жеткізілген уағдаластықтарға сәйкес ынтымақтастық туралы меморандумға қосымша үшжақты келісімге қол қойды.
Сондай-ақ тараптар «Астана қаласында жаңартылатын энергия көздерін пайдаланатын энергия тиімді көппәтерлі тұрғын үй кешені» жобасын іске асыру жөніндегі жол картасына қол қойды.
Құжаттарға сәйкес, компаниялар BIM-технологиялар, математикалық модельдеу, 3D-визуалдау және жасанды интеллект сияқты ғимараттарды жобалау және салу кезінде жаңа технологиялар трансферін жүзеге асыра бастайды, сондай-ақ «ҮТЖҒЗИ» ЖШС базасында BIM-технологиялар мен жобалық менеджментін оқыту бойынша академия құрады.
Мұндай шешімдерді пайдалану жобалау үрдісін, техникалық сипаттамалардың сәйкестігін тексеруді, объектілер салудың өзіндік құны мен уақытын дәл есептеуді сапалы етуге мүмкіндік береді.
Сондай-ақ, фин делегациясының сапары аясында «ТКШ ҚазОрталығы» АҚ кеңсесінде Финляндияның инженерия саласындағы инновациялық технологиялық компанияларын ұсынатын «Onninen Oy» халықаралық компаниясының басшылығымен кездесу өтті.
Тараптар кәріздік-тазарту ғимараттарын салу және жаңғырту жөніндегі жобаларды іске асыру мәселелерін, соның ішінде Қазақстанда жабдықтар өндіру мүмкіндігі мен қажеттілігін талқылады.
Кездесу барысында «ТКШ ҚазОрталығы» АҚ директоры-Басқарма мүшесі Әділхан Өмірбаев Мемлекет басшысының Қазақстанның түрлі өңірлерінде «жасыл» экономика саласында үздік фин шешімдерін енгізу жөніндегі тапсырмасына сәйкес біздің орталық республика аумағында тиісті фин технологияларын ілгерілетуге ықпал етуге дайын екенін атап өтті. Сондай-ақ, фин компанияларымен ынтымақтастық екі тарапқа да ұзақ мерзімді пайда әкелетініне сенім білдірді.
