АҚШ-тың белгілі саясаткері, Дональд Трамптың бұрынғы кеңесшісі Стив Бэннон алдағы уақытта АҚШ-тың президенті Дональд Трамптың түрмеге түсуі мүмкін екенін болжады, деп хабарлайды BAQ.KZ.
The Hill басылымының айтуынша, бұл 2028 жылғы президент сайлауында демократтар жеңіске жетсе, жүзеге асуы ықтимал.
Құдай сақтасын, егер біз 2028 жылы жеңіске жете алмасақ, президент Трамп түрмеге отырады, – деді Бэннон.
Саясаткердің айтуынша, АҚШ-та қазірдің өзінде саяси соғыс басталып кетті, әрі оның салдары қандай болатынын болжау қиын. Ол демократтардың Трампты кез келген жолмен саясат сахнасынан ығыстыруға тырысып жатқанын, ал егер олар 2026 жылы Өкілдер палатасын қайтарып алса, Трампқа импичмент жариялауға тырысатынын мәлімдеді.
Егер біз демократтар Трампты тоқтату үшін бар күшін салып жатқанын мойындамасақ, өз-өзімізді алдағанымыз, – деді Бэннон.
Айта кетерлігі, Стив Бэннон Трампқа қандай нақты айыптар тағылуы мүмкін екенін нақтыламаған. Дегенмен, ол демократтардың Трамптың билікке оралуына жол бермеу үшін барлық саяси механизмдерді іске қосатынын ескертті.
Сонымен қатар, АҚШ-тағы билік өкілдері мен сот жүйесінің арасындағы шиеленіс күшейіп келеді. Ақ үй мен оның командасы өздеріне кедергі келтіріп отырған судьяларға қарсы саяси риторикасын арттырып, елдегі конституциялық дағдарысқа алаңдаушылық тудырып отыр.
2
0
0
0
0
