АҚШ президенті Дональд Трамп Еуропалық Одақпен (ЕО) сауда қатынастарын Қытаймен саудадан да "жиіркенішті" деп атады. Бұл туралы ол Ақ үйде журналистермен өткізген баспасөз мәслихатында мәлімдеді, деп хабарлайды BAQ.KZ.
Олар [ЕО] өте жаман. Мен Еуропалық Одақпен сауда жасауды Қытаймен салыстырғанда көптеген жағынан жиіркенішті деп есептеймін, – деді Трамп.
Президенттің айтуынша, ЕО американдық фармацевтикалық компанияларды өздеріне ұнамайтын өнім шығаруға мәжбүрлейді және жиі түрде оларды сотқа беріп, өз елдерінің сот жүйесін пайдаланады.
Сонымен қатар, Трамп ЕО-ны осы сот процестерінен түскен қаражатты еуропалық саясаткерлердің өз елдерінің мүддесіне жұмсайтынын айтып, айып тақты.
Біз олармен енді ғана айналыса бастадық. Олар жақын арада тынышталады. Олар бізге өте әділетсіз қарады, – деп қосты ол.
Еске сала кетейік, 2 сәуірде Трамп АҚШ-қа жеткізілетін барлық өнімдерге 10% базалық кедендік тариф енгізілетінін хабарлады. Еуропалық елдер үшін бұл көрсеткіш 20%-ға дейін жеткен. Президент бұл күнді "американдықтар қайтадан бай бола бастайтын күн" деп сипаттады.
Алайда, жауап ретінде Еуропалық Одақ елдері АҚШ-қа қарсы шаралар қабылдауға ниетті екенін мәлімдеді. 6 сәуірде ЕО елдері бірігіп, АҚШ импортына 28 миллиард долларға дейін қарсы баж салығын енгізетін шараларды қарастырмақ. 7 сәуірде Еуропалық комиссия осы қарсы шаралар қолданылатын америкалық өнімдердің тізімін ұсынуға уәде берді.
