АҚШ президенті Дональд Трамп әзербайжандық әріптесі Ильхам Әлиевке хат жолдап, 2025 жылғы Нобель сыйлығына кандидатурасын ұсынғаны үшін ризашылығын білдірді, деп хабарлайды BAQ.KZ ТАСС агенттігіне сілтеме жасап.
Хатта Трамп Премьер-министр Никол Пашинянмен бірге жазылған ұсыныс үшін алғысын жеткізген.
Премьер-министр Пашинянмен менің Нобель сыйлығына кандидатурамды ұсыну туралы бірлескен хатыңыз үшін алғыс айтамын. Сізге маңызды миссиямызды жалғастыруға шабыттандыратын осы жоғары баға үшін терең ризашылығымды білдіремін, – делінген хабарламада.
Сонымен қатар Трамп АҚШ президенті ретінде бүкіл әлемдегі қақтығыстарды тоқтатуға, барлық адамдар үшін бейбітшілік пен әл-ауқатты қамтамасыз етуге дайын екенін атап өтті. Хатта ол Әлиев пен Пашинянмен тұрақты серіктестік арқасында мүмкін емес нәрселерге қол жеткізуге болатынын жеткізген.
Хабарлама мәтіні Әзербайжан президентінің ресми сайтында жарияланған.
