Астанада Мемлекет басшысы Қасым-Жомарт Тоқаевтың төрағалығымен өткен ҰҚШҰ саммитінде қандай мәселелер талқыланғаны белгілі болды, деп хабарлайды BAQ.KZ тілшісі.
ҰҚШҰ бүгінде ұжымдық қауіпсіздікке бағытталған тиімді, сұранысқа ие халықаралық құрылым ретінде әрекет етеді. Өзінің даму жылдарында мүше-мемлекеттер кең ауқымды мәселелер бойынша өзара әрекеттесуде бай тәжірибе жинақтады. Кең ауқымды нормативтік-құқықтық база қалыптастырылды. Заманауи сын-қатерлер мен қауіптерге қарсы тұрудың қажетті тетіктері белгіленді. Ұжымдық қауіпсіздіктің күштері мен құралдары құрылып, жұмыс істеп жатыр. Бірқатар беделді халықаралық және өңірлік ұйымдармен сындарлы ынтымақтастық орнатылды, - деді Президент.
Тоқаев атап өткендей, 2022 жылы ҰҚШҰ аясында ТМД және ШЫҰ-мен ынтымақтастықты нығайту туралы шешім қабылданды.
Мемлекет басшысы бүгінгі отырысқа осы халықаралық ұйымдардың жетекшілері қатысып жатқанын айтты.
Біз жаңа ғана халықаралық және өңірлік қауіпсіздіктің өзекті мәселелері бойынша егжей-тегжейлі пікір алмастық. Қазақстанның төрағалығымен биылғы ҰҚШҰ қызметінің негізгі нәтижелері талқыланды. Кездесу нәтижелері біздің ұжымдық қауіпсіздікке қауіп-қатерлердің алдын алу үшін есеп беруге және әрекет етуге дайын екенімізді тағы бір рет растады. Талқылау барысында біз халықаралық күн тәртібіндегі өзекті мәселелер бойынша өз ұстанымдарымызды салыстырдық. Соңғы жағдайға берген жалпы бағаларымыз және ҰҚШҰ-ның одан әрі дамуына көзқарасымыз Қазақстанның бастамасымен әзірленген Ұжымдық қауіпсіздік кеңесінің декларациясында көрсетілген, - деді Қасым-Жомарт Тоқаев отырыста сөйлеген сөзінде.
Мемлекет басшысы Қазақстанның ҰҚШҰ-ға төрағалығы аясында ынтымақтастықтың жарғылық бағыттары бойынша 60-қа жуық іс-шара өткізілгенін қоса кетті.
Еске сала кетейік, отырысқа Беларусь президенті Александр Лукашенко, Қырғызстан президенті Садыр Жапаров, Тәжікстан президенті Эмомали Рахмон және Ресей президенті Владимир Путин мен ҰҚШҰ бас хатшысы Иманғали Тасмағамбетов қатысты.
Бұған дейін хабарлағанымыздай, Мемлекет басшысы Қасым-Жомарт Тоқаев Қазақстан төрағалығы кезінде ҰҚШҰ алдында тұрған барлық міндет орындалғанын айтты.
