Балалар қалдықтарды қалай өнер мен сұлулыққа айналдырады, деп хабарлайды BAQ.KZ.
Алматыда «Таза Қазақстан» бағдарламасы аясында пластикалық қақпақтарды жинау акциясының алғашқы маусымы аяқталды. Қаладағы 200-ден астам мектеп пен балабақша бірігіп, 1,26 миллионнан астам қақпақ жинады. Жетісу, Алмалы және Әуезов аудандары көш бастады.
21 желтоқсанда «Молл Апорт East» сауда орталығында акцияға қатысушыларды марапаттау, эко-жәрмеңке мен қалдықтарды қайта өңдеу бойынша шеберлік дәрістері ұйымдастырылады.
Сонымен қатар, ерекше балалар эко-жаттықтырушылардың жетекшілігімен қайта өңделген материалдардан мерекелік ойыншықтар жасады. Бұл бұйымдарды ірі компаниялар сатып алып, экологиялық бастаманы қолдады.
Қақпақтарды жинау акциясымен қатар мүсінші Талғат Жұмағұл қайта өңделген пластиктен бірегей жаңа жылдық шырша жасады. Бұл туынды экологиялық мәселелерді шешуге деген үміттің символына айналып, қаланы Жаңа жыл қарсаңында сәндендірді.
Ұйымдастырушылар акцияны тұрақты шара етіп, қала тұрғындарының экологияға деген жауапкершілік әдетін қалыптастыруды жалғастыруды жоспарлап отыр.
