СҚО әкімі көпбалалы отбасыларды құттықтады және өңірдегі ана мен бала денсаулығын қолдау шараларын атап өтті, деп хабарлайды BAQ.KZ.
Облыс орталығындағы көпбалалы отбасыларды өңір басшысы келе жатқан мерекемен құттықтады. Димаш және Газима Жакуповтар жеті баланы, ал Светлана Кулага сегіз баланы тәрбиелеп отыр.
Облыс әкімі перинаталдық орталықта батыр аналар Әсемгүл Сагитова мен Манат Маханбеталиеваны қуанышты сәттермен құттықтап, сәбидің дүниеге келуімен оларға бақыт тілеп, алты баланың анасы атанғандарын атап өтті. Орталықтағы басқа да аналар құттықтау алды. Барша аналарға мықты денсаулық, бақыт және береке тіледі.
Солтүстік Қазақстан облысы ана мен жаңа туған сәбидің денсаулығын белсенді түрде қолдайды. Орталықта сапалы медициналық көмек пен қамқорлық көрсетілуде, 53 тәжірибелі дәрігер жұмыс істейді. Сондай-ақ, 10 акушер-гинеколог бюджет есебінен резидентурада оқып, өңірдің медициналық кадрлық әлеуетін нығайтуға септігін тигізуде.
Биыл өңірде 4,2 мың бала дүниеге келді. Сонымен қатар, бала сүюді армандаған отбасыларға қолдау көрсетіледі. Мемлекет басшысының тапсырмасымен жүзеге асып жатқан «Аңсаған Сәби» бағдарламасы аясында қазіргі заманғы ЭКО әдістері қолданылады. Тек биылдың өзінде осы бағдарлама арқылы 102 бала солтүстікқазақстандық отбасыларға бақыт сыйлады.
Облыста 7,4 мың көпбалалы отбасы бар. Олар жәрдемақы, атаулы әлеуметтік көмек, жеңілдіктер, автобуста тегін жүру, тұрғын үймен қамтамасыз ету және жеңілдетілген ипотека сияқты шаралармен қамтылған. Бұл шаралар көпбалалы отбасылардың өмір сапасын жақсартуға және балаларды тәрбиелеу үшін қолайлы жағдайлар жасауға бағытталған.
