Шымкент қаласы және Түркістан облысы, BAQ.KZ тілшісі. Шымкент қаласында алғаш рет «GraMad» көтерме тарату орталығы ашылды. Мұнда делдал қызметінсіз өндіруші өнімдері тікелей тұтынушыға ұсынылады. Орталықта көтерме, бөлшек сауда, логистикалық бағытта және темір жол тұйығы жұмыс атқарады.
Гипермаркеттің ашылу салтанатына қатысқан Шымкент қаласы әкімінің орынбасары Д. Жумин қала жұртшылығын осынау маңызды объектінің пайдалануға берілуімен құттықтады.
Сонымен қатар әкім орынбасары «Біздікін сатып ал» акциясы шеңберінде қолға алынған «Шымкент өнімдері» сауда алаңшасымен танысып, барлығын жергілікті өнімдерді сатып алуға шақырды.
«Шымкент өнімдері» сауда алаңшаларының тауарлары орташа нарық бағасынан 10% төмен бағада ұсыну жоспарланған.
Аталған орталықтың жалпы алаңы 11 мың шаршы метр. Оның ішінде сауда алаңы 3,5 мың шаршы метр, логистикалық қоймалар алаңы 7 500 шаршы метрді құрап отыр.
Бұл жоба «Бизнестің жол картасы-2020» мемлекеттік бағдарламасы шеңберінде қолдау тапты. Жалпы 3,5 млрд теңге жеке инвестиция құйылып, 200 ден аса жаңа жұмыс орындарымен қамтылды.
Аталған сауда орталығы Шымкент қаласындағы Жібек-жолы көшесі, 58 үй мекенжайында орналасқан.
Еске салсақ, бұған дейін Мемлекет басшысы Нұрсұлтан Назарбаев Үкіметтің кеңейтілген отырысында көтерме-тарату орталықтарының желісін дамытуды тапсырған болатын.
Содан кейін ауыл шаруашылығы министрлігі көтерме-тарату орталықтары ең алдымен Қарағанды, Астана, Алматы және Шымкент қалаларында іске қосылатынын хабарлаған еді.
