Риддер қаласында түні бойы толассыз жауған қардың қалыңдығы бір метрден асты, деп хабарлайды BAQ.KZ.
Қалың қар көлік қозғалысына біраз кедергі келтірген.
Бір тәуліктің ішінде бір айлық қардың нормасы түсті. Коммуналдық қызмет 24/7 жүмыс істеп жатыр. Түні бойы 13 техника тоқтаусыз қаланы қардан тазартумен болды. Күндіз де қала жолдарын тазалау жұмыстары тоқтатылмады. Жеке меншіктегі техника иелерін тарту арқылы бүгін 30 техника үздіксіз жұмыс істеді. Қазір техниканың жартысы екінші ауысымға шығып, көшелер түнде де қардан тазартылатын болады, - деді Риддер қаласының ішкі саясат, мәдениет, тілдерді дамыту және спорт бөлімінің басшысы Қанат Оралбек.
Қалың қармен қарбласып, қаладағы су беру жүйесінде 4 апаттық жағдай орын алып, қалада бірнеше үй сусыз қалды.
Қалада 340 шақырым ауыз су құбыры бар. Бір жерде болмасын, бір жерде құбырлардың жарылуы қалыпты жағдай. Қазіргі уақытта 4 апаттық жағдай да қалпына келтірілді. Қала тұрғындары ауыз сумен толық қамтылды, - деп қосты Қанат Оралбек.
