Нұр-Сұлтан, BAQ.KZ. Жамбыл облысының әкімі Бердібек Сапарбаев пен Нидерланды елшісі Андре Картенс Шу ауданында фри картобы зауытының құрылысы мәселесін талқылады.
Жамбыл облысының әкімі Бердібек Сапарбаев Нидерланды Корольдігінің Қазақстан, Қырғызстан мен Тәжікстан елдеріндегі төтенше және өкілетті елшісі Андре Картенспен кездесті. Ол өңірімізде жүзеге асырылатын ортақ жобалар жайын пысықтау үшін келген. Нидерланды елінің «Farm Frites Beheer» компаниясы жергілікті «К-Агро Холдинг» ЖШС-мен бірлесіп Шу ауданында Фри картобын өндіру зауытын салуды жоспарлауда. Жоба құны 145 млн долларға бағаланған. Жүзеге асқан жағдайда 240 жаңа жұмыс орны құрылмақ. Жоспар бойынша зауыт 2023 жылы қолданысқа беріледі деп күтілуде. Кездесуде аймақ басшысы инвесторларға қажетті көмекті аямайтынын жеткізді. Қазіргі уақытта болашақ зауыттың орналасатын жері белгіленіп қойған. Оған қажетті инфрақұрылым да тартылған.
Қазір ең басты мәселе – құрылысты жедел бастау керек. Уақыт өтіп барады. Кәсіпорын бізге керек. Оның шығаратын өнімі экспортталатын болады, - деді Бердібек Сапарбаев.
Осы ретте Андре Картенс құрылыстың созбалаңға салынғаны олар үшін тиімсіз екенін атап өтті. Сапарбаев елшінің сөзін қостай отыра, тұщымды жауап қайтарды.
К-Агро Холдинг» директорлар кеңесі төрағасының кеңесшісі Жеңіс Өсербайдың айтуынша, инвесторлар зауыт салмас бұрын 65 га жерге картоп егіп, өнімділік деңгейін бақылауға ниетті. Жүздесуге Ауыл шаруашылығы министрінің орынбасары Нұрбек Дайырбеков те қатысты. Ортақ жобаның келешегі зор екенін атап өткен вице-министр Нидерланд тарапымен өзге де жобаларды бірлесе жүзеге асыруға болатынын тілге тиек етті. «Біздің облыс аграрлы-индустриалды аймақ болып саналады. Көкөніс, жеміс-жидек, әсіресе таулы аймақ болған соң алма жақсы өседі. Жеріміз құнарлы. Қазіргі жобаны жүзеге асырып болған соң өзге де ұсыныстар әзірлейміз. Өзара әріптестік қатынас ауқымын кеңейтуге дайынбыз. Инвесторлардың көбеюіне бейілміз, - деп түйіндеді Бердібек Сапарбаев.
