Нұр-Сұлтан, BAQ.KZ. Бүгін қазақ әдебиеті күні десек, артық бола қоймас. Өйткені 28 қыркүйек – әдебиетіміздің үш бірдей алыбы Мұхтар Әуезовтің, Шерхан Мұртазаның және Оралхан Бөкейдің туған күндері, деп жазды Мәулен Әшімбаев Facebook-тегі парақшасында.
Қайталанбас туындыларымен ұлттың жоғын түгендеген және ұрпаққа өшпес өсиет қалдырған сөз зергерлерінің мұрасын дәріптеу – бізге міндет. Осы ретте қазақтың әр баласы Әуезовті, Шерағаңды және «Алтайдың Кербұғысы» атанған Оралханды міндетті түрде оқуы керек дер едім. Сол арқылы біз Абайды танимыз және сөздің құдіретін зерделеуге, ұлттық болмысымыздың сән-салтанатына зер салуға мүмкіндік аламыз. Ең бастысы, өркениеттің шыңына жетелейтін кітап оқу деген қағиданың қадір-қасиетін түсінеміз. Заңғар жазушыларымыздың жатқан жерлері жарық, топырақтары торқа болсын! - деп жазды ол.
