Салғырттық па, салақтық па? Маңғыстауда 65 мектепте санитарлық талаптар сақталмаған

Жыл басынан бері эпидемиологтар облыстағы 66 мектепте тамақтандыру қызметі нысандарына жоспардан тыс тексеру жүргізген. Оның 65-інде (98,5%) көптеген санитарлық бұзушылықтар анықталды. Бұл туралы облыстық санитарлық-эпидемиологиялық бақылау департаменті мәлімдеді, деп хабарлайды BAQ.KZ.

Бұл жайында Lada.kz жазды.

Мектептерде санитарлық сертификаттың жоқтығы, өнімдердің таңбалануы мен сақтау шарттарының бұзылуы, тыйым салынған өнімдерді қолдану (пицца, оралған тәттілер, глутамат қосылған дәмдеуіштер, кофе), санитарлық-техникалық жағдайдың нашарлығы, қызметкерлерді уақтылы медициналық тексеруден өткізбеу, сондай-ақ ыдыс жууға арналған сынамалардың 7,2 пайызында ішек таяқшасының болуы анықталды.

Тексеру қорытындысы бойынша жалпы сомасы 19 994 220 теңгені құрайтын 61 айыппұл салынды, 64 ұйғарым шығарылды, 62 қызметкер жұмыстан шеттетілді, бір іс сотқа жолданды, - деп хабарлады ведомстводан.