Астанада алғаш рет RoboZerde-2023 қалалық роботтехника фестивалі өткізілді, деп хабарлайды BAQ.KZ.
Ғылыми-техникалық сайыста елордалық оқушылар арасында жас ерекшеліктеріне байланысты «РобоСпорт» және «Шығармашылық жоба» бағыттары бойынша үздіктер анықталды.
Әлихан Мақсұт физика-математика және өзге де пәндерден республикалық, халықаралық олимпиадаларда олжа салып, роботтехника сынды ғылыми-шығармашылық бағыттарда ерекше дарынымен танылған жас өрен еді. RoboZerde байқауын қолға алудағы мақсат өмірден ертен озған жас таланттың өнегелі ғұмырын өскелең ұрпаққа дәріптеу арқылы озық ойлы, еліміздің болашақ ғалымдарына жол ашу.
Л.Н.Гумилев атындағы Еуразия ұлттық университетінде жалауы көтерілген фестивальді Әлихан Мақсұт атындағы дарынды балаларды қолдау қоры, «Астана дарыны» дарынды балалар мен талантты жастарды анықтау орталығы, №9 «Зерде» мамандандырылған мектебі және «Роботек» роботтехника мектебі бірлесіп ұйымдастырғанын айта кеткен орынды.
Қазақстанда шет мемлекеттерде білім алып, жас ұрпақты ғылым мен технологияның тіліне баулып жүрген азамат көп. Өкініштісі оларды дәріптеу жағы кенжелеп тұр. Дамыған, алпауыт елдердің қатарынан көрінгіміз келсе, ғылым мен білімге, оның ішінде робот құрастыру сынды жастардың құштарлығын арттыратын тың бастамаларға басымдық беруіміз қажет. Баламның арманы да сол еді. Сондықтан да жастарымыздың озық идеяларын қолдап, іске асуына атсалысайық, - деді белгілі ақын Серікзат Дүйсенғазы.
RoboZerde-2023-тің ашылуына AMANAT партиясының атқарушы хатшысы Елнұр Бейсенбаев, Парламент Мәжілісінің депутаттары Асхат Аймағамбетов, Ринат Зайытов және басқа да зиялы қауым өкілдері келіп қатысты.
Аталған іс-шараның барысында танымал кинорежиссер Мұрат Есжанның «Әлиханның арманы» атты деректі фильмі көрсетілді. Сондай-ақ жарыста өзара мықтыны анықтаған оқушыларға қаржылай сыйлықтар табысталды
