Антикор Атырау тұрғындарының сыбайлас жемқорлық қылмыс жасалатыны туралы хабарлағаны үшін ақшалай марапат алу науқанына қалай қатысып жатқаны жөніндегі ақпаратты ықыласпен ұсынды, деп хабарлайды BAQ.KZ azh.kz-ке сілтеме жасап.
Айта кетерлігі, бұл адамдардың бәрі дерлік мемлекеттік қызметкерлер.
Мәселен, 2023 жылы алты адамға грамота, ал екі адамға 2 341 500 теңге көлемінде ақшалай сыйақы (1 адамға 2 100 000 теңге (пара сомасының 10%), екінші адамға 241 500 теңге (70 АЕК) төленді.
2024 жылы сегіз адам марапатталып, олардың жартысына грамоталар берілсе, қалған төртеуі 1 314 350 теңге көлемінде ақшалай сыйақы алды (1 адамға 241 500 теңге, 2 адамға 258 440 теңге, 3 адамға 214 410 теңге, ал 4 адамға пара сомасының 10%-ы ретінде 600 000 теңге төленді).
Ал 2025 жылдың өткен кезеңінде бір адамға 258 440 теңге (70 АЕК) сыйақы берілді.
Айтпақшы, «ең бай» сыбайлас жемқорлыққа қарсы белсенді 2022 жылы облыс әкімінің бұрынғы орынбасарын әшкерелеуге көмектескені үшін 12 миллионын алған, әзірге оның рекордын ешкім жаңарта алған жоқ.
