АҚШ президенті Дональд Трамп алдағы аптада Қытайдан келетін жартылай өткізгіштерге (чиптерге) арнайы тариф енгізетінін мәлімдеді, деп хабарлайды BAQ.KZ тілшісі Reuters-ке сілтеме жасап.
Келесі аптада Қытайдан импортталатын жартылай өткізгіштерге тариф жариялаймын, - деді Ақ үй басшысы жексенбі күні журналистерге берген сұхбатында.
Ол жаңа тарифтерден смартфондар мен компьютерлер уақытша босатылатынын, бірақ бұл жеңілдік ұзаққа созылмайтынын айтсды. Президенттің сөзінше, басты мақсат — аталған саланы АҚШ аумағында дамытып, өндірісті ел ішінде шоғырландыру.
Біз өндіріс үдерісін оңтайландырғымыз келеді. Чиптер, жартылай өткізгіштер және басқа да өнімдерді өз елімізде өндіруді қалаймыз, - дейді Трамп.
Сондай-ақ ол бұл саладағы кейбір компанияларға икемді шарттар ұсынылатынын атап өтті.
Еске салайық, АҚШ пен Қытай арасындағы сауда соғысы биылғы 2 сәуірде басталды. Дональд Трамп әлем елдеріне қарсы ауқымды кедендік баж салығын енгізетінін жариялағаннан кейін, Қытай да жауап ретінде қарсы тарифтер енгізді.
Нәтижесінде екі ел арасындағы өзара кедендік салық көлемі 125%-ға жетті. Бұған қоса, АҚШ Қытайды синтетикалық есірткілерге қарсы тиісті шара қолданбады деп айыптап, қосымша 20% баж салығын енгізген еді. Өз кезегінде Қытай сирек кездесетін металдарды экспорттауға шектеу қойды.
0
0
0
0
0
