3-7 қараша күндері Абай облысы Үржар ауданында Ұлттық спорт түрі «Құсбегіліктен» Мемлекеттік Рәміздердің 30 жылдығына арналған І Әлем Чемпионаты өтеді. Бұл туралы Берік Уәли өзінің әлеуметтік парақшасында жазады, деп хабарлайды BAQ.KZ.
Өз дәуірінде ардақталып, атадан балаға мұра болған әдет-ғұрпымыз, салт-дәстүріміз бен өшпес өнеріміз замандар сынынан өтіп, бүгінгі ұрпаққа жетті. Бабаларымыздың бай мұрасы мен асыл қазынасы оны ардақ тұтып, қастерлегеннің арқасында жалғасын тауып келеді,- дейді ол.
Сондай-ақ ол жүйрік ат, қыран бүркіт, құмай тазысын ұмытпаған халқымыздың дәстүрлі аңшылығы бүгінде жаңа сипатқа ие екенін айтты.
![Құсбегіліктен Әлем чемпионаты өтеді](/userfiles/images/311792283_5369934413129947_2039585308374844766_n.jpg)
Мемлекет басшысы Қасым-Жомарт Кемелұлы Тоқаевтың биыл Қазақстан халқына арнаған Жолдауында ұлттық құндылықтарымызға ерекше назар аударғаны белгілі. Халқымыздың «жеті қазынасының» бірі – қазақ тазысын қорғау туралы Президент тапсырмасына сәйкес елімізде біршама істер қолға алынуда. Биыл алғашқы рет ҚР Мәдениет және спорт министрлігінің Күнтізбелік жоспарына сәйкес Құсбегілердің І әлем чемпионаты Абай облысының Үржар ауданында өтеді,- дейді Уәли.
Ол сөз кезегінде жарыстың өтуіне қолдау көрсетіп отырған облыс әкімі Нұрлан Ұранхаев мырзаға алғыстан басқа айтары жоқ екенін айтып өтті.
![Құсбегіліктен Әлем чемпионаты өтеді](/userfiles/images/311514506_5369934469796608_5238892978977248163_n.jpg)
Ақсүйек өнердің жанашыры ғана емес, құс салып, тазы жүгірткен құсбегі әулетінің перзенті ретінде жаныма жақын, «қорғаушысының қарасы көрінбейтін, қолдаушысы табылмай жүрген» саланың дамуына қал-қадірімізше жанашыр азаматтармен бірге бар күш-жігерімді салып қолдау көрсетіп келеміз. Алда өтетін осы ауқымды ұлттық спорт шарасының жүлде қорына қамқорлық танытып, демеушілік жасап, қолдау көрсетеміз дейтін азаматтар болса, бек қуаныштамыз,- дейді ол.
Сондай-ақ ол әлемнің бірнеше мемлекетінің құсбегілермен қатар жарысқа еліміздің өңірлерінен 70-ке тарта бүркітші, қаршығашы, ителгі ұстап, тазы ерткен саятшылар қатысады деп жоспарлап отырғанын тілге тиек етті.
Елімізге белгілі құсбегілер Бағдат Мүптекеқызы апаймыз және Базарбек бауырмен алдағы айтулы жарыстың ұйымдастыру жұмыстарын пысықтадық. 3-7 қараша күндері Үржар ауданында Құсбегіліктен өтетін І Әлем Чемпионатының жоғары деңгейде өтуіне қолдау білдіріп, бір жағына шығысамыз дейтін азаматтар болса әрдайым есігіміз ашық,- дейді Берік Уәли.