Өткен жылы құрғақшылықтан зардап шеккен павлодарлық шаруаларға субсидиялау, тоңазытқыштарға алынған несие мерзімін шегеру және қосымша арзандатылған жанар-жағармай бөліну қарастырылған, деп хабарлайды BAQ.KZ агенттігінің тілшісі.
Еске сала кетейік, былтыр 40-қа жуық шаруашылық зардап шегіп, 48 мыңнан астам гектарлық егістік алқабы күйіп кетті. Бұл аумақтың басым бөлігі дәнді-дақыл тұқымы себілген жерлер болды. Фермерлер қуаңшылдыққа байланысты төтенше жағдай режимін жариялауды сұраған. Осы күнге дейін 38 шаруашылық иесіне 1,3 млрд теңге көлемінде сақтандыру төлемдері берілген.
Өткен жыл өңір фермерлері үшін қиын болды. Салдарынан өнімділік көлемі азайып кетті. Ауыл шаруашылығы өнімдерінің физикалық көлем индексі 13%-ға төмендеді. Бұған қарамастан алдымызда Мемлекет басшысының ауыл шаруашылығы және сауда салаларының көрсеткіштерін 20%-ға көтеру тапсырмасы тұр, - дейді облыс әкімі Асайын Байханов.
Ауыл шаруашылығы басқармасы басшысының міндетін атқарушы Сәуле Шүкірованың айтуынша, құрғақшылық салдарын жойып, фермерлерді қолдау шаралары қабылданды.
Басым міндет - көктемгі дала жұмыстарын сапалы жүргізу. Қабылданған жол картасына сәйкес биыл ауыл шаруашылығы дақылдарының аумағын 1,6 млн гектарға жеткізбекпіз. Бұл өткен жылмен салыстырғанда 20,3 мың гектарға артық. 25,7 мың тонна арзандатылған дизель бөлінді. Шығынға батқан шаруаларға көктемгі егіс жұмыстары қарсаңында салалық министрлікпен қаржылық қолдау шараларының екі пакеті қарастырылған, - дейді ол.
Облыстық бюджеттен сыйақы мөлшерлемелерін арзандату үшін 7,2 млрд теңге бөлінді. Бұл қарыз алушы үшін нарықтық мөлшерлемені 5%-ға дейін төмендетуге мүмкіндік береді.
