Қоғамдық тәртіпті нығайту және құқық бұзушылықтың алдын алу бойынша жүргізіліп жатқан жұмыстар аясында Қосшы қаласы мен Тайтөбе ауылында шағын бизнес өкілдерінің белсенді азаматтық ұстанымының оң үлгісін көрсетті. Ондағы бірқатар дүкен мен сауда нүктелері алкогольдік өнімдерді сатудан бас тарту туралы өз еркімен шешім қабылдады, деп хабарлайды BAQ.KZ.
Ақмола облысы прокуратурасының мәліметінше, кәсіпкерлердің бұл бастамасын прокуратура мен жергілікті атқарушы органдар қолдады. Алдын алу шаралары барысында қала прокуратурасы дүкен иелеріне ризашылықтарын білдіріп, алғыс хаттар, естелік сыйлықтар табыстай отыра, мұндай шешімнің қоғамдық қауіпсіздік үшін маңыздылығын ерекше атап өтті.
Осындай қадамдар құқық бұзушылық деңгейін, әсіресе мас күйде және қоғамдық орындарда жасалатын құқық бұзушылықтарды азайтуға көмектеседі, сондай-ақ қоғамда саналы тұтыну мәдениетін қалыптастырады, - деп хабарлады облыстық прокуратурадан.
Қосшы қаласының прокуратурасы осы бастамаға атсалысқан кәсіпкерлерге алғысын білдіріп, басқа да бизнес өкілдерін құқықтық тәртіп пен ұлт денсаулығын қамтамасыз етуге үлес қосып, оң үлгі алуға шақырады.
Бұған дейін Маңғыстауда екі ауыл ішімдіктен толық бас тартқанын жазғанбыз. Ал Қызылорда облысындағы 18 ауылда ішімдік сатылмайды.
Сондай-ақ 2025 жылғы 24 шілдеде Қазақстанда алкоголь сату тәртібін күшейту ұсынылғанын хабарлаған болатынбыз.
