Мәжіліс депутаты Ринат Зайытов Әлеуметтік-мәдени даму комитетінің отырысында бірнеше өзекті мәселені көтеріп, Денсаулық сақтау министрі Ақмарал Әлназароваға сұрақ қойды, деп хабарлайды BAQ.KZ тілшісі.
МӘМС – мемлекетке жасалған үлкен қастандық деп ойлаймын. Оның ішінде біріншісі – Президенттің сөзін бұрмалау. Президент жолдауында "міндетті" деген сөзді айтқан жоқ. Онда "ерікті әлеуметтік медициналық сақтандыруды тәжірибеге енгізуді ұсынамын" деді. Біздікілер "шаш ал десе, бас алады". Ерікті дегенді міндетті қылып жібердік. МӘМС-ті қазір тоқтата алмасақ, мен сізге бір мысал айтып берейін. Аягөзде МӘМС-тің жоқтығынан адам қайтыс болған. Сондықтан жаппай халықты қабылдайтын жүйе ойлап табуларыңызды сұраймын, - деді ол.
Зайытовтың сөзінше, жан басын қаржыландыру бойынша аудандардан, ауылдардан келген шағымдар бар.
Мысалы, бір ауылда бір адамда диабет. Оған адам толмайды деп дәрі бермейтін көрінеді. Ол жағдайда не істеу керек? Басқа ауылдағы ауруларды сол ауылға көшіреміз ба? Ол жағы қалай болады? Айта-айта шаршаған мәселеміз – мүгедектікке шығару. Осыны бір жақты қылыңыздаршы, құдай үшін. Осыны айта-айта шаршадық. Қолы жоқ, аяғы жоқ адам неге 2-3 жыл келіп дәлелдеуі керек. Оның қолы-аяғы өсіп кетпейді ғой. Осыны түсіну қиын емес шығар. Аяқ-қолы жоқ адам неліктен 2-3 рет келіп өзінің мүгедек екенін дәлелдеу керек? Қолы мен аяғы өсіп кетпейді ғой?!, – деп сұрады депутат.
