Су тасқыны мен құрғақшылықтың алдын алу үшін мемлекеттік органдарға алгоритм жасалды, деп хабарлайды BAQ.KZ тілшісі.
Мәжілістің жалпы отырысында Су ресурстары және ирригация министрі Нұржан Нұржігітов Су кодексін таныстырды. Ведомство басшысы құжатта қандай механизмдер бар екенін айтты.
Су кодексінің жобасы бойынша уәкілетті органға құқықбұзушылықтарға жедел ден қою үшін қадағалау функциялары жүктеледі. Суды заңсыз пайдалану, есепке алу құрылғыларының болуы, су қоры бар жерлерде шаруашылық қызметін жүзеге асыруға рұқсаттар бөлігінде су заңнамасы талаптарының сақталуын бақылау Кәсіпкерлік кодексінің қолданылу аясынан шығарылады.
Сонымен қатар судың (су тасқыны немесе құрғақшылық) зиянды әсерінің алдын алу бойынша мемлекеттік органдардың іс-әрекетінің алгоритмі белгіленеді.
Ілеспе заң жобасында 5 кодекс пен 9 заңға өзгерістер мен толықтырулар енгізіледі. Атап айтқанда, жер қойнауын пайдаланушылармен жыл сайынғы өндірістік шығындардың 1% мөлшерінде су қорғау саласындағы жобаларды қаржыландыру, елдімекендерді егжей-тегжейлі жоспарлау жобаларында су қорғау аймақтары мен белдеулерінің шекараларын белгілеу.
