Параволейболдан Қазақстан құрамасы Париж-2024 Паралимпиада ойындарына жолдама ұтып алды, деп хабарлайды BAQ.KZ.
Бүгін 6 шілдеде пара волейболдан Қазақстан ерлер құрамасы Азия чемпионатының жартылай финалында Қытай құрамасын 3:2 есебімен жеңіп, Парижде өтетін Паралимпиада ойындарының жолдамасына ие болды.
Финалдық кездесу 8 шілдеде сағат 16.30-да Иран командасымен Жекпе-жек спорт комплексінде өтеді.
Пара волейболдан Иран құрамасы өткен жылы әлем чемпионатында жеңіске жетіп, Парижде өтетін Паралимпиада ойындарына жолдама алған болатын. Сол себепті Қазақстан спортшылары Азия чемпионатының финалисті ретінде автоматты түрде келесі жылғы Паралимпиада ойындарының лицензиясына қол жеткізіп отыр, - деді Қазақстан пара волейбол фдерациясының бас хатшысы Батыр Қадырбайұлы.
Айта кетсек, соңғы рет пара волейболдан Қазақстан құрамасы 1996 жылы Атлантада өткен Паралимпиада ойындарына қатысқан болатын. Биыл пара волейболдан Азия чемпионаты алғаш рет Астанада өтуде. Байрақты бәсекеде Азия континентінің үздік 7 ерлер командаcы қатысады.
