Сауда және интеграция вице-министрі Қайрат Төребаев Қазақстан мен Ауғанстан арасындағы сауда-экономикалық қатынастар мен олардың даму әлеуеті жайында мәлімет берді, деп хабарлайды BAQ.KZ тілшісі.
3 тамыз күні Қазақстан-Ауғанстан бизнес-форумы мен ауған тауарларының көрмесі болады. Ауғанстанның сауда министрі Нұриддин Азизи бастаған 200-ден астам делегация келеді деп жоспарланған.
Ауғанстан - қазақстандық ұнның негізгі тұтынушысы. Біз бүкіл ұн экспортының 70% - ауған халқына жөнелтеміз. Біздің бизнесмендер осы бағытта жемісті ынтымақтасып келеді. Өткен жылы ұн жеткізу көлемі 52%-ға (2021 жылы 895 мың тоннадан 2022 жылы 1,3 млн тоннаға дейін), бидай – 20% – ға (2021 жылы 572 мың тоннадан 2022 жылы 687 мың тоннаға дейін), күнбағыс майы-6,2 есе (2021 жылы 2825 тоннадан 2022 жылы 17,5 мың тоннаға дейін) артып, биылдан бастап қара бидай жөнелтіле бастады. Бұл тауарлардың сұраныс әлеуеті өте зор, - деді Қайрат Төребаев Сыртқы істер министрлігінде өткен брифингте.
2013 жылдан бастап Ауғанстанда қазақстандық компаниялардың 6 сауда-экономикалық миссиясы өткізілді. Ауғанстан Қазақстанға жемістер, көкеністер, жаңғақтар және т.б өзінің ауыл шаруашылығы өнімдерін ұсына алады.
Айта кетейік, көрме аясында Ауған кәсіпкерлері ең танымал тауарлардың барлық ассортиментін ұсынады.
Саяжан Құдайберген
