Қарағандыда 1-ЖЭО және 3-ЖЭО алдағы жылыту маусымына дайындық паспорттарын алды, деп хабарлайды BAQ.KZ облыс әкімдігінің сайтына сілтеме жасап.
Құжат энергия жабдықтарының сенімді жұмысын қамтамасыз ету үшін іс-шаралардың орындалғанын растайды.
Бұл туралы "Қарағанды Энергоцентр" компаниясы хабарлады.
Станцияның жалпы дайындық индексі жеке көрсеткіштерден тұрады. Тексеру барысында генерациялаушы және жылу желілік жабдықтардың төмен температура жағдайында жұмыс істеуге, диспетчерлік жүктемелер кестесін жүргізуге техникалық дайындығына ерекше назар аударылады. Сондай-ақ, персоналдың дайындығы, қорғаныс құралдарымен және арнайы киіммен жасақталуы тексерілді, – делінген хабарламада.
Компанияның мәліметінше, 1-ЖЭО-да энергетикалық және су жылыту қазандық агрегаттарына күрделі жөндеу жүргізілді, турбинаға кеңейтілген-ағымдағы жөндеу жүргізілді. Ағымдағы жөндеулермен үш энергетикалық және екі су жылыту қазандық агрегаты, үш турбина қамтылды. № 1 қазандық агрегатына ағымдағы жөндеу жұмыстары аяқталуда.
3-ЖЭО-де: қазандық агрегатын күрделі жөндеу және турбинаны кеңейтілген-ағымдағы жөндеу, бес қазандық пен төрт турбинаны ағымдағы жөндеу аяқталды. Қазандық пен турбинаны күрделі жөндеу, № 3 қазандық агрегатын ағымдағы жөндеу аяқтау сатысында.
Отынның – көмір мен мазуттың нормативтік қоры құрылды. Жылыту маусымы барысында оның тиісті мөлшері сақталып отырады.
