Қарағандыда көпсалалы облыстық балалар клиникалық ауруханасы ашылды, деп хабарлайды BAQ.KZ.
Ол тәулік бойы 200 төсекке арналған. Онда 450 дәрігер жұмыс істейтін болады. Ғимаратта жүре алмайтын науқастарды тасымалдауға арналған лифтілер жабдықталған.
Жаңа ауруханада сәбилерге де, үлкен балаларға да сапалы көмек көрсету үшін барлық жағдай жасалған. Бұл нысанның құрылысы бірқатар себептерге байланысты созылды. Атап айтқанда, біз заманауи жоғары технологиялық жабдықты жеткізуді көптен күттік. Мысалы, Жапониядан күйікке қарсы жеті төсекке тапсырыс берілді, – деді Қарағанды облысының әкімі Ермағанбет Бөлекпаев.
Инновациялық күйікке қарсы кереуеттер нөлдік гравитация мен нөлдік ауырлық әсерін жасайды. Төсек толтырғышының тығыздығын судың тығыздығымен салыстыруға болады, сондықтан қатты күйік шалған науқас "жүзіп" жатқандай болады. Бұл зақымдалған теріге қысым жасамауға көмектеседі. Микросфералар арқылы өтетін ауа автоматты түрде қажетті температураға дейін қызады және бактериялардың көбеюіне жол бермей, теріге кептіру әсерін тигізеді.
Ауруханада консультативтік орталық жұмыс істейді. Бар бөлімшелермен қатар үш жаңа бөлім болады – травматология және ортопедия, нейрохирургия, жақ-бет.
Бұрын осы бейіндер бойынша пациенттерді емдеу үшін біз ана мен бала орталығына, травматология және ортопедия институтына, Мақажанов атындағы клиникаға немесе Астананың нейрохирургия ғылыми орталығына жолдадық, – дейді Қарағанды облысы Денсаулық сақтау басқармасының басшысы Бибігүл Төлегенова.
– Енді біз өзімізде емдей аламыз. Біздің жабдықтар жоғары технологиялық, операциялық бөлмелер автономды желдетумен жабдықталған, оларда HEPA сүзгілері орнатылған.
Мұнда ең күрделі операцияларды жасауға болады. Жақын арада біздің нейрохирургтер Германия мен Израильде оқудан өтеді.
Медициналық мекеме базасында ЕДШ заманауи кабинеттері, тұз, сенсорлық және шунгитті бөлмелер жабдықталған.
Сондай-ақ, "ҚАМҚОРЛЫҚ" ерте даму орталығы жұмыс істей бастайды, онда үш айдан үш жасқа дейінгі балалар кешенді оңалту көмегін ала алады. Орталық ай сайын әртүрлі неврологиялық диагноздары бар 50-ге дейін баланы қабылдауды жоспарлап отыр. Оңалту курсының ұзақтығы 21 күнді құрайды.
Осы уақытқа дейін балалар ауруханасы болған ғимарат медицина қызметкерлеріне арналған көпқабатты тұрғын үй ретінде қайта құрылады. Жас мамандарға арналған 94 пәтер жабдықтау жоспарланып отыр.
Жаңа көпсалалы облыстық балалар клиникалық ауруханасы Кеншілер даңғылы, 81/1 мекенжайы бойынша орналасқан.
