Облыстық Жастар ресурстық орталығы Қарулы күштердің 30 жылдығына арнап, Қарағанды гарнизонының күш құрылымдары арасында офицерлер балын ұйымдастырды, деп хабарлайды BAQ.KZ.
Жыл сайын өткізілетін офицерлік бал Қарағанды қаласының дәстүрлі шараларының біріне айналған. Шарада мерекелік киімдегі ержүрек әскерилер салтанатты жағдайда әсем көйлекті арулармен жұртшылыққа жұптық вальс биін паш етіп, музыкалық сүйемелдеумен жиналған қауымды ерекше көңіл-күйге бөлейді.
Іс-шараның негізгі мақсаты – жастар арасында Қазақстан Республикасы Қарулы күштері және басқа да күштік құрылымдары қатарындағы әскери қызметтің беделін кеңінен насихаттау, сондай-ақ әскерилер мен қоғам арасында алтын көпір орнату. Салтанатты балда әркім өзінің шығармашылық қабілетін, сыр-сымбатын, ар-намыс қасиетін көрсете алады.
.jpg)
Шараға Қазақстан Республикасы Ұлттық ұланы атынан «Орталық» өңірлік қолбасшылығына қарасты 6505 әскери бөлімі 2 атқыштар батальоны 3 рота командирінің тәрбие және әлеуметтік-құқықтық жұмыстар жөніндегі орынбасары лейтенант Баймахан Жансері мен Индира Болатқызы қатысты.
Аталмыш офицерлік бал көптеген қатысушыларды, қоғам және бұқаралық ақпарат өкілдерін және сымбаттылыққа әуес қонақтардың басын қосты.
