Қарағанды және Қостанай облыстарының мектептері оқу жылын бес күндік форматта бастайтын болды, деп хабарлайды BAQ.KZ.
Оқу-ағарту министрлігінің мәліметінше, Қарағанды облысындағы 436 мектеп туралы болып отыр, онда 173 мыңға жуық бала оқиды. Бір ауысымда 25 мың бала оқитын 149 мектеп жұмыс істейді. Сондай-ақ енді облыста 24 мыңнан астам мұғалім аптасына бес күн жұмыс істейді.
Қостанай облысында өңірдегі барлық 457 мектеп бес күндік форматта оқиды. Онда 112 мың бала білім алады. Сонымен қатар өңірдегі 14 мыңға жуық мұғалім сенбі күні демалады.
Бұл туралы Оқу-ағарту министрінің қатысуымен өткен жаңа оқу жылына дайындық жөніндегі кеңесте Қарағанды облысы білім басқармасының басшысы Гүлсім Қожахметова мен Қостанай облысы білім басқармасының басшысы Зәуре Бәйменова хабарлады.
Бұл Оқу-ағарту министрлігінің оқу жүктемесін азайту, оқу жылын созу және оқу жүктемесін біркелкі қайта бөлу туралы шешімдерінің арқасында мүмкін болды.
Республикалық тамыз конференциясының пленарлы отырысында Оқу ағарту министрі Асхат Аймағамбетов былай деген болатын:
Келесі оқу жылынан бастап үш ауысымда оқытатын мектептерді қоспағанда, барлық мектеп бес күндік жұмыс форматында оқуы тиіс. Бұл қосымша 36 демалыс күн кем дегенде 1,5 млн оқушыға ғана әсер етпейді. Сонымен қатар бұл шешім директорларға, директор орынбасарлары мен мұғалімдерге қатысты болады, енді олар қосымша 36 демалыс күнін алады. Біз мұғалімдер сенбіде демалып, балаларымен бірге болып, өзін-өзі дамытуы керек деп есептейміз. Әріптестерімде «мұндай шешім демалыс күндерін қысқартуға әсер ете ме?» деген сұрақ туындауы мүмкін. Бұл ретте 56 күндік демалыс өзгеріссіз қалатынын хабарлаймын. Бұл шешім жалақыға да әсер етпейді, - деді ҚР Оқу-ағарту министрі Асхат Аймағамбетов.
